Ózbekstan Respublikası Prezidentiniń qararı

Ózbekstan Respublikası Prezidentiniń 2025-jıl 11-marttaǵı “Ózbekstan Respublikasında shaxsqa tiyisli maǵlıwmatlardı qorǵaw jumısın bunnan bılay da jetilistiriw boyınsha ilajlar haqqında”ǵı PP-45-sanlı Pármanınıń orınlanıwın támiyinlew jáne migraciya hám personallastırıw tarawında basqarıw sistemasın jetilistiriw, jasalma intellekt imkaniyatlarınan keńnen paydalanıw arqalı xalıqqa jedel hám sapalı xızmet kórsetiw jáne tarawda sanlastırıw processlerin izbe-iz dawam ettiriw maqsetinde qarar etemen:
I. Tiykarǵı baǵdarlar
1. Tómendegiler migraciya hám personallastırıw tarawında mámleketlik siyasattıń tiykarǵı baǵdarları etip belgilensin:
a) ishki isler uyımlarınıń migraciya hám personallastırıw bólimlerin basqıshpa-basqısh operativlik hám ashıq-aydınlıq principleri tiykarında xalıqqa jáne de qolaylı hám sapalı xızmet kórsetetuǵın “servis bólimleri”ne aylandırıw;
b) migraciya hám personallastırıw tarawında respublika – wálayat – rayon (qala) bólimleriniń jumısın shólkemlestiriwdi sapa jaǵınan jańa basqıshqa kóteriw hám olardıń nátiyjeliligin arttırıw;
v) migraciya hám personallastırıw tarawında kórsetiletuǵın mámleketlik xızmetlerdi sanlastırıw;
g) shaxsqa tiyisli maǵlıwmatlardıń durıslıǵı hám isenimliligin támiyinlew;
d) tarawǵa zamanagóy málimleme-kommunikaciya texnologiyaların keńnen engiziw arqalı bar málimleme sistemalarında málimleme qáwipsizligi hám kiberqáwipsizlikti támiyinlew.
II. Shólkemlestiriw ilajları
2. Tómendegiler:
a) Ózbekstan Respublikası Ishki isler ministrligi janındaǵı Migraciya hám personallastırıw departamenti (keyingi orınlarda – Departament) haqqındaǵı reje 1-qosımshaǵa muwapıq;
b) Ishki isler uyımlarınıń migraciya hám personallastırıw tarawındaǵı jumısın sapa jaǵınan jańa basqıshqa alıp shıǵıw boyınsha “jol kartası” 2-qosımshaǵa muwapıq tastıyıqlansın.
3. 2026-jıl 1-maydan baslap eksperiment tárizinde Tashkent, Samarqand hám Ferǵana wálayatları jáne Qaraqalpaqstan Respublikasında rayon (qala)lıq ishki isler uyımlarınıń migraciya hám personalizaciyalaw bólimlerinde ózine-ózi xızmet kórsetiw imkaniyatı jaratılǵan, jasalma intellekt tiykarında jumıs alıp baratuǵın “Aqıllı” migraciya shaqapshaları (Smart migration stations) shólkemlestirilsin. Bunda:
a) dáslepki basqıshta “Aqıllı” migraciya shaqapshalarında 3-qosımshada keltirilgen mámleketlik xızmetler kórsetiledi;
b) Ishki isler ministrligi tárepinen ózine-ózi kórsetiletuǵın xızmetler túrleri keńeytilip barıladı.
4. Ishki isler ministrligi (A.A.Tashpulatov) 2027-jıl 1-mayǵa shekem eksperiment nátiyjesinen kelip shıǵıp, “Aqıllı” migraciya shaqapshaların respublikanıń basqa aymaqlarında, sonday-aq, sawda hám kewilashar oraylar, turistlik aymaqlarda da shólkemlestiriw boyınsha Ministrler Kabinetine usınıs kirgizsin.
III. Xalıqqa qolaylıqlar jaratıw
5. Ishki isler ministrligi, Sanlı texnologiyalar ministrligi, Salıq komiteti jáne Kámbaǵallıqtı qısqartıw hám bántlik ministrliginiń tómendegi usınısları maqullansın:
a) 2026-jıl 1-maydan baslap Departament hám onıń aymaqlıq basqarmalarına Ózbekstanǵa elektron kiriw vizası tiykarında kirip kelgen sırt el puqaraları hám puqaralıǵı bolmaǵan shaxslardıń elektron vizalarınıń ámel etiw múddetin bir márte 30 kúnge shekem sozdırıw huqıqın beriw;
b) sırt el puqaralarına Ózbekstan Respublikası aymaǵında miynet etiw huqıqın beretuǵın tastıyıqlamanı rásmiylestiriw wákilligin Departament hám onıń aymaqlıq basqarmalarına da beriw;
v) aymaqlıq ishki isler uyımları basshılarına sırt el puqaraları bilim alıp atırǵan mákemeler yamasa miynet penen shuǵıllanıp atırǵan kárxana hám shólkemlerde viza múddetin sozdırıw, turǵan jeri boyınsha dizimnen ótkeriw ushın kárxana, mákeme hám shólkemlerdiń qarjıları esabınan shártnama tiykarında migraciya bólimine attestaciyalanǵan qosımsha shtat birliklerin kirgiziw huqıqın beriw;
g) 2026-jıl 1-sentyabrden baslap studentler jataqxanasına jaylasıw boyınsha shártnama dúziw menen bir waqıtta studentlerdiń turǵan ornı boyınsha dizimge alıwdıń kompozit tártibin engiziw;
d) 2026-jıl 1-fevraldan baslap fizikalıq táreplerge identifikaciyalawshı ID kartalar birinshi márte rásmiylestirilgende onıń chipine kirgiziletuǵın elektron sanlı imza sertifikatın biypul beriw hám puqaranı “Elektron húkimet” sisteması paydalanıwshıların identifikaciyalaw birden-bir málimleme sistemasında avtomat tárizde biypul dizimnen ótkeriw.
IV. Migraciya hám personallastırıw tarawın sanlastırıw
6. Departament fizikalıq táreplerdiń tómendegi oraylıq maǵlıwmatlar bazaların qáliplestiriw hám turaqlı jańalap barıw boyınsha wákillikli uyım bolıp esaplanadı:
a) sırt el puqaraları hám puqaralıǵı bolmaǵan shaxslardıń, sonday-aq, Ózbekstan Respublikası puqaralarınıń jasaw hám turǵan jeri boyınsha dizimge alınǵan mánzili haqqındaǵı maǵlıwmatlar;
b) identifikaciyalawshı ID karta seriyası, nomeri, berilgen ornı hám de berilgen sánesi hám tamamlanıw sánesi haqqındaǵı maǵlıwmatlar;
v) Ózbekstan Respublikası puqaralıǵı haqqındaǵı maǵlıwmatlar;
g) Ózbekstan Respublikası puqaraları, Ózbekstan Respublikasında turaqlı jasaytuǵın sırt el puqaraları hám puqaralıǵı bolmaǵan shaxslar haqqındaǵı maǵlıwmatlar;
d) Ózbekstan Respublikasına mirát etilgen shet el puqaraları hám puqaralıǵı bolmaǵan shaxslar haqqındaǵı, sonday-aq, olardıń viza múddeti sozdırılǵanlıǵı haqqındaǵı maǵlıwmatlar.
7. Ishki isler ministrligi (A.A.Tashpulatov) 2026-jıl 1-avgustqa shekem jasalma intellekt texnologiyaları tiykarında:
a) migraciya hám personallastırıw tarawına baylanıslı elektron mámleketlik xızmetlerdi kórsetiw, onlayn huqıqıy másláhát beriw, júklemesi az bolǵan migraciya bólimleri haqqında maǵlıwmat alıw imkaniyatın beretuǵın “Pasport-viza” avtomatlastırılǵan málimleme sistemasınıń kompleksiniń “Passport-visa” mobil qosımshasın islep shıqsın.
Onda bul mobil qosımsha arqalı kórsetiliwi názerde tutılǵan migraciya hám personallastırıw tarawına baylanıslı elektron mámleketlik xızmetler dáslep Birden-bir interaktiv mámleketlik xızmetler portalında jolǵa qoyıladı;
b) sırt el puqaraları hám puqaralıǵı bolmaǵan shaxslar tárepinen Ózbekstanda bolıw qaǵıydalarına ámel etiliwin “Qáwipsiz qala” sisteması arqalı anıqlaw hám monitoring etiw imkaniyatın jaracın;
v) migraciya hám personallastırıw tarawında basqa shaxstıń kelisimi talap etiletuǵın mámleketlik xızmetlerdi kórsetiwde olardıń shaxsın avtomatlastırılǵan málimleme sisteması kompleksiniń “Face-ID” moduli arqalı aralıqtan turıp anıqlaw hám kelisimin alıw imkaniyatın beretuǵın “E-Rozilik” platformasın iske qossın.
8. 2026-jıl 1-sentyabrden baslap tómendegi mámleketlik xızmetlerdi Birden-bir interaktiv mámleketlik xızmetler portalı hám mámleketlik xızmetler orayları arqalı kórsetiw imkaniyatı jaratılatuǵını belgilensin:
a) sırt elde jasap atırǵan watanlaslar hám olardıń shańaraq aǵzaların Ózbekstan Respublikasına mirát etiw;
b) puqaralıǵı bolmaǵan shaxslardıń biometrikalıq háreketleniw hújjetlerin rásmiylestiriw ushın arza jiberiw;
v) múlk iyesi yamasa turǵan ornı boyınsha dizimge alınǵan Ózbekstan Respublikası puqarasınıń múrájatı tiykarında onıń turǵan ornı boyınsha dizimge alınǵanlıǵın biykarlaw ushın arza jiberiw.
9. Ishki isler ministrligi Sanlı texnologiyalar ministrligi menen birgelikte 2026-jıldıń aqırına shekem shaxsqa baylanıslı maǵlıwmatlardıń turaqlı jańalanıwı hám qáwipsizligin támiyinlew, mámleketlik xızmetlerdiń sanın arttırıw jáne tákirarlanatuǵın maǵlıwmatlardı birlestiriw arqalı málimleme resurslarınan paydalanıw qolaylıǵın arttırıw maqsetinde Personallastırıw orayınıń maǵlıwmatlar bazaları hám programmalıq támiynatların Ishki isler ministrliginiń “Pasport-viza” avtomatlastırılǵan málimleme sistemasınıń kompleksine birlestirsin. Bunda:
a) shaxsqa tiyisli maǵlıwmatlar jámlengen “Birden-bir sanlı migraciya” platforması jaratıladı (Digital migration platform);
b) “Pasport-viza” avtomatlastırılǵan málimleme sistemasınıń kompleksin jetilistiriw, qollap-quwatlaw, Departament hám onıń tómengi sistemaları ushın server, kompyuter hám basqa da qurılmalardı satıp alıwǵa baylanıslı qárejetler Ishki isler ministrligi hám Personallastırıw orayınıń byudjetten tısqarı qarjıları esabınan ámelge asırıladı.
V. Qarardıń orınlanıwın shólkemlestiriw, támiyinlew hám qadaǵalaw
10. Ishki isler ministrligi (Z.K.Kurbanov) Departamenttiń málimleme texnologiyaları hám telekommunikaciya infrastrukturaların rawajlandırıw jáne texnikalıq qollap-quwatlaw, sonday-aq, barlıq málimleme sistemaları, programmalıq támiynatlar hám maǵlıwmatlar bazalarında málimleme qáwipsizligin támiyinlew ilajların kórsin.
11. Ishki isler ministrligi (A.A.Tashpulatov) úsh ay múddette:
a) migraciya hám personalizaciya bólimlerine sırt el puqaraları hám puqaralıǵı bolmaǵan shaxslardıń Ózbekstanda nızamsız miynet iskerligi menen shuǵıllanǵanı ushın hákimshilik ilaj kóriw wákilligin beriwdi názerde tutıwshı nızam joybarın islep shıqsın;
b) nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
12. Ózbekstan Respublikası Prezidentiniń ayırım qararlarına 4-qosımshaǵa muwapıq ózgerisler hám qosımshalar kirgizilsin.
Usı qarardıń orınlanıwın nátiyjeli shólkemlestiriwge juwapker hám jeke juwapker etip Ózbekstan Respublikası ishki isler ministri A.A.Tashpulatov belgilensin.
Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidenti Administraciyası departament baslıǵı D.B.Kadirovqa júklensin.

Ózbekstan Respublikası
Prezident Sh.MIRZIYoEV
Tashkent qalası,
2026-jıl 19-yanvar