Keshe Saudiya Arabstanınıń Ar-Riyad qalasındaǵı “Shaxzada Faysal bin Fahd Sport Siti” stadionında futbol boyınsha 23 jasqa shekemgi jaslar arasında ótkerilip atırǵan Aziya kuboginde 3-tur oyını bolıp ótti.
Onda Ravshan Xaydarov basshılıǵındaǵı Ózbekstan jaslar saylandı komandası «S» toparınıń jetekshisi bolıp kiyatırǵan Qubla Koreya saylandı komandası menen óz-ara ushırastı. Qızıqlı ótken oyınnıń birinshi taymında komandamız futbolshıları tárepinen bir neshe qáwipli hújimler shólkemlestirilgeni menen dárwazaǵa gol urılmadı.
Ekinshi taym baslanıwı menen komandamızda eki ózgeris júz berdi. Atap aytqanda, Muhammedaliy Reymovtıń ornına Saidumarxon Saidnurullaev, Abduǵafur Haydarovtıń ornına Amirbek Saidovlar maydanǵa túsirildi. Bul oyında túpkilikli ózgeris jasap, komandamızdıń oyındaǵı ústinligin támiyinledi hám ushırasıwdıń 48-minutında Behruz Karimov, 70-minutında Saidumarxon Saidnurullaev Qubla Koreya dárwazasın eki márte anıq nıshanǵa alıwǵa eristi. Ushırasıwdıń qalǵan minutlarında da komandamız bir neshe márte Koreya dárwazasına gol urıw imkaniyatına iye boldı. Biraq, oyında bunnan basqa gol urılmadı.
Solay etip, bul toparda Ózbekstan saylandı komandası 7 upay menen birinshi, Qubla Koreya saylandı komandası 4 upay toplap, jarıstıń sherek finalına jollamanı qolǵa kirgizdi. Sherek final oyını 17-yanvar kúni ótkeriledi.

Adilbay Orazov,
Qaraqalpaqstan xabar agentligi sholıwshısı.