2029-jıl 1-fevralǵa shekem zergerlik tarawındaǵı islep shıǵarıwshılarǵa kóplegen jeńillikler berilmekte. Yaǵnıy, olardıń jaratıp atırǵan jumıs ornına qarap, satıp alıp atırǵan qımbat bahalı metall hám altın bahasında (1 procentten 4 procentke shekem) shegirme berilmekte. Hesh bir mámlekette bunday jeńillik joq.
2025-jıldıń ózinde zergerlik tarawında isbilermenlik subektleriniń sanı derlik 4 esege kóbeydi. Tayar zergerlik ónimleriniń eksportı 5,1 tonnaǵa arttı. Yamasa 439 million dollarǵa jetip, aldınǵı jılǵa salıstırǵanda 4,7 esege artqan.
Bul haqqında Oliy Majlis Nızamshılıq palatasınıń májilisinde aytıp ótildi. Májiliste yarım tayar zergerlik buyımların Ózbekstan Respublikası bajıxana aymaǵınan sırtqa alıp shıǵıw tártibin jetilistiriwge qaratılǵan nızam joybarı birinshi oqıwda dodalandı.
Atap ótilgenindey, mámleketimizde zergerlik sanaatın rawajlandırıwdı qollap-quwatlaw, zergerlik buyımlarınıń eksportın arttırıwǵa qaratılǵan keń kólemli jumıslar ámelge asırılmaqta. Sonıń menen birge, tarawda eksportyorlardı qollap-quwatlaw, yarım tayar zergerlik buyımları menen baylanıslı processlerdi jetilistiriwge baylanıslı ilajlardı kóriw zárúrligi júzege kelmekte.
Bul nızam joybarı bahalı metallar hám bahalı taslar, olardan tayarlanǵan zergerlik hám basqa da buyımlardıń nızamsız aylanısın azaytıwǵa qaratılǵan. Nızam joybarı menen bahalı metallardan tayarlanǵan yarım tayar zergerlik buyımların Ózbekstan Respublikası bajıxana aymaǵınan sırtqa alıp shıǵıwda Ekonomika hám qarjı ministrligi janındaǵı Mámleketlik hasıllıq dárejesin qadaǵalaw inspekciyasınıń juwmaǵın alıw názerde tutılmaqta.
Sonday-aq, 2029-jıl 1-fevralǵa shekem zergerlik tarawındaǵı islep shıǵarıwshılarǵa bir qatar jeńillikler beriw názerde tutılmaqta.
Nızam joybarınıń qabıl etiliwi bahalı metallar hám bahalı taslardıń aylanısı tarawındaǵı mámleketlik siyasattı jetilistiriw, jergilikli zergerlik sanaatın rawajlandırıw, nızamlı jumıs alıp barıp atırǵan jergilikli isbilermenlerdi qollap-quwatlawǵa xızmet etedi.

Muhtarama Komilova,
ÓzA