Kolumbiya jetekshisi Gustavo Petro AQSh Prezidentiniń bayanatına juwap retinde keskin shıǵıp sóyledi. “Euronews”tiń jazıwınsha, ol Venesuela basshısı Nikolas Maduro tutqınǵa alınıwınan keyin kúsheygen basım sharayatında suverenitet máselesi qáwip astında qalsa, mámleket “qolına qural alıwǵa májbúr bolıwı múmkin eken”ligin bildirdi.
– Men qaytadan qural paydalanbawǵa ant etkenmen, biraq Watan ushın soǵan májbúr bolıwım múmkin, – dep sociallıq tarmaqta járiyalanǵan Petronıń múrájatınan úzindi keltirgen basılım.
Petro aldın M-19 partizanlar toparınıń aǵzası edi. Bul háreket 1989-jılǵı tınıshlıq kelisimine tiykarlanıp quralın taslaǵan.
Sonıń menen birge Tramptıń Petroǵa qarata kemsitiwshi bayanatı hám onı náshebentlik zatlar sawdasına baylanıslılıqta ayıplawı artınan júzege kelgen keskinlik ádewir kúsheydi. Hár qıylı dawalar dálil menen tastıyıqlanbasa da, Kolumbiya basshısı hám onıń shańaraq aǵzalarına finanslıq sankciya engizildi. Sonıń menen birge, bul mámleket AQShtıń náshebentlikke qarsı gúresiw boyınsha birge islesiwshi mámleketler diziminen shıǵarıldı.
Óz gezeginde Petro Qurama Shtatlardıń Karib regionındaǵı áskeriy ámeliyatın sınǵa alıp, kúsh isletiw awır aqıbetke alıp keletuǵının atap ótti. Onıń aytıwınsha, anıq razvedka maǵlıwmatısız ámelge asırılǵan hújim biygúna xalıq, sonıń ishinde, balalar qurban bolıwına alıp keledi hám zorlıqtı jáne de kúsheytedi.
Aytpaqshı, Tramp administraciyası Kolumbiyadaǵı oń qanat oppoziciya menen tıǵız baylanıstı saqlap qalmaqta. Ulıwma, mámlekette usı jılı bolıp ótetuǵın parlamentlik hám prezidentlik saylawlar tiykarında regiondaǵı siyasiy jaǵday barǵan sayın keskin tús almaqta.

Musulmon Ziyo, ÓzA