Колумбия етакчиси Густаво Петро АҚШ Президенти баёнотига жавобан кескин чиқиш қилди. “Euronews” ёзишича, у Венесуэла раҳбари Николас Мадуронинг қўлга олиниши ортидан кучайган босим шароитида суверенитет масаласи хавф остида қолса, мамлакат “қўлига қурол олишга мажбур бўлиши мумкинлиги”ни билдирди.

– Мен қайта қурол ишлатмасликка қасам ичганман, аммо Ватан учун шунга мажбур бўлишим мумкин, – дея Петронинг ижтимоий тармоқда эълон қилинган мурожаатидан иқтибос келтирган нашр.

Петро илгари М-19 партизанлар гуруҳи аъзоси эди. Бу ҳаракат 1989 йил тинчлик келишуви асосида қуролини ташлаган.

Айни пайтда Трампнинг Петрога нисбатан ҳақоратли баёноти ва уни гиёҳванд моддалар савдосига алоқадорликда айблаши ортидан юзага келган кескинлик анчайин кучайди. Турли даъволар далил билан тасдиқланмаса-да, Колумбия раҳбари ва унинг оила аъзоларига молиявий санкция жорий қилинди. Қолаверса, ушбу мамлакат АҚШнинг гиёҳвандликка қарши кураш бўйича ҳамкор давлатлари рўйхатидан чиқарилди.

Ўз навбатида Петро Қўшма Штатларнинг Кариб минтақасидаги ҳарбий амалиётини танқид қилиб, куч ишлатиш оғир оқибатга олиб келишини таъкидлади. Унинг айтишича, аниқ разведка маълумотисиз амалга оширилган ҳужум бегуноҳ аҳоли, жумладан болалар қурбон бўлишига олиб келади ва зўравонликни янада кучайтиради.

Дарвоқе, Трамп маъмурияти Колумбиядаги ўнг қанот мухолифат билан яқин алоқани сақлаб қолмоқда. Умуман, мамлакатда шу йил бўлиб ўтадиган парламент ва президентлик сайлови асносида минтақадаги сиёсий вазият тобора кескин тус олмоқда.

Мусулмон Зиё, ЎзА