Prezident Shavkat Mirziyoevqa 15-dekabr kúni suw xojalıǵında energiya nátiyjeliligin arttırıw, ilimiy potencialdı rawajlandırıw hám xalıqaralıq birge islesiwdi bekkemlew jumısları boyınsha málimleme berildi.

Bárinen burın, eskirgen hám energiya jumsalıwı joqarı nasos agregatların zamanagóy, energiyanı únemleytuǵınlarına almastırıw boyınsha rejeler kórip shıǵıldı.
Máselen, Qaraqalpaqstan Respublikasında 274 nasos stanciyası bolıp, olar arqalı 185 mıń gektardan aslam jer maydanları suwǵarılmaqta. Stanciyalardaǵı nasos agregatlarınıń yarımınan kóbi 1979-jıldan berli islep shıǵarılǵan úskenelerden ibarat bolıp, olardıń energiya jumsalıwı zamanagóy nasoslarǵa salıstırǵanda 2-3 esege joqarı.
Kegeyli rayonındaǵı eski agregatlardan biri zamanagóy energiya únemlewshige almastırılǵanda, elektr energiyasınıń jumsalıwı eki esege azayǵan.
Bul unamlı tájiriybeden kelip shıǵıp, Qaraqalpaqstandaǵı 276 nasostı basqıshpa-basqısh zamanagóy energiya únemlewshi agregatlarǵa almastırıw rejelestirilgen. Nátiyjede jılına 25 milliard sumǵa teń elektr energiyası únemleniwi hám joybar qárejetleri 14 ay ishinde ózin aqlaytuǵını atap ótildi.
Bul baǵdarda jergilikli islep shıǵarıwshılardı qollap-quwatlaw áhmiyetli ekenligi kórsetip ótildi.
Sonday-aq, Tashkent irrigaciya universitetinde erisilgen nátiyjeler hám keleshektegi rejeler haqqında maǵlıwmat berildi.
Házirgi kúnde universitette 8682 student bilim almaqta, 571 professor-oqıtıwshı jumıs alıp barmaqta, ilimiy potencial dárejesi 73,5 procentti quraydı.
Universitet xalıqaralıq reytinglerde joqarı nátiyjelerge erisip, “THE World University Rankings 2026” reytinginde dúnya universitetleri arasında 501-orındı, Oraylıq Aziya hám Kavkaz artı mámleketleri boyınsha 2-orındı, Ózbekstanda 1-orındı iyeledi, “QS World University Rankings 2026” nátiyjelerine bola bolsa 469-orınǵa kóterildi.
Ótken jılı universitet aymaǵında 200 orınlıq zamanagóy IT orayı qurıldı, sanlı kitapxana hám registrator ofisiniń jumısı jolǵa qoyıldı. Universitettiń bilimlendiriw baǵdarları bes jıl múddetke xalıqaralıq akkreditaciyadan ótkerildi. Oqıw procesine dúnyanıń TOP-300lik universitetlerin pitkergen jerleslerimiz hám sırt el professorları tartılǵan.
Keleshekte klimat ózgeriwin tallaw ushın sanlı texnologiyalarǵa tiykarlanǵan milliy platforma jaratıw, universitet aymaǵında kosmoslıq baqlaw stanciyaların qurıw, jasalma joldas maǵlıwmatların qabıl etiw infrastrukturasın rawajlandırıw rejelestirilgen.
Sonday-aq, universitettiń “Suw diplomatiyası” magistratura baǵdarına xalıqaralıq status beriw názerde tutılǵan. Mámleketimiz basshısı Tashkent irrigaciya universitetin dúnyanıń TOP-300 universitetleriniń qatarına kirgiziw boyınsha anıq ilajlar islep shıǵıwdı tapsırdı.
Prezentaciyada xalıqaralıq birge islesiw máselelerine de ayrıqsha itibar qaratıldı.
Atap ótilgenindey, sońǵı aylarda Tashkent qalası ishimlik suwı hám aqaba xızmetlerin jaqsılawǵa baǵıshlanǵan birinshi Oraylıq Aziya konferenciyası hám Suw kodeksiniń kúshke kiriwine baǵıshlanǵan xalıqaralıq konferenciyaǵa basshılıq etti.
Bul ilajlardıń logikalıq dawamı sıpatında kelesi jılı mart ayında Tashkent xalıqaralıq suw hápteligin ótkeriw rejelestirilgeni málim etildi. Forum xalıqaralıq institutlar hám region mámleketleri menen birge islesiwdi bekkemlew, suw resurslarınan aqılǵa uǵras paydalanıw hám “jasıl” texnologiyalardı engiziw boyınsha pikirlesiw maydanı bolıp xızmet etedi.
Bul ilajdı joqarı dárejede ótkeriw hám kelesi jılı Aralboyı aymaǵında suwdı únemlew texnologiyalarına baǵıshlanǵan xalıqaralıq forumǵa puqta tayarlıq kóriw boyınsha kórsetpeler berildi.

ÓzA