Prezident Shavkat Mirziyoev Awıl xojalıǵı tarawı xızmetkerleri kúni múnásibeti menen taraw wákilleri menen sóylesiw ótkermekte.

– Álbette, bunday úlken nátiyjeler artında diyqan hám fermerlerimiz, klasterler, ulıwma, awıl hám suw xojalıǵı tarawındaǵı hár bir insannıń miyneti, mártligi, pidayılıǵı tur, desek durıs boladı. Olardıń miyneti, márt hám ullı pazıyletleri hár qanday tán alıw hám itibarǵa ılayıq.

Sonıń ushın da búgin Awıl xojalıǵı xızmetkerleri kúni aldında sizler menen kórisip, sáwbetlesip, mámleketimizdiń joqarı sıylıqları menen sıylıqlawǵa qarar ettim,-dedi Prezidentimiz.

Sıylıqlanǵanlar arasında paxtadan 80-90 centner, ǵálleden 115 centnerge shekem zúráát alǵan, atızına suwdı únemleytuǵın texnologiyalar hám nasoslarına quyash panelin keńnen engizgen fermer hám klasterler, miywe-ovoщ, sharwa, qus, balıq, pal hárreshilikte intensiv usıllardı qollanıp, azıq-awqat qáwipsizligi hám eksportqa úlken úles qosıp atırǵan diyqan, sharwa  hám eksportyorlar bar.

Suw jetispewshiligi sharayatında kanallardı betonlaw, suwdıń esabın ornına qoyıp, ádil bólistirip atırǵan irrigaciya-melioraciya xızmetkerleri hám mexanizatorlar, awıl hám suw xojalıǵına ilimniń jańa jetiskenliklerin alıp kirip atırǵan, tuqımgershilik, násilshilik hám agrotexnologiya boyınsha innovaciyalar jaratıp atırǵan ilimpazlar da joqarı sıylıqlarǵa iye boldı.

Paxta, ǵálle hám baǵshılıqta keskin ózgeris jasay alǵan Jızzaq, Qashqadárya, Surxandárya, Xorezm wálayatları hákimleriniń awıl xojalıǵı boyınsha orınbasarları, Quva, Balıqshı, Doslıq, Tómengi Shırshıq hám Nókis rayonlarınıń hákimleri de bar.

Mámleketimiz basshısı joqarı ataq, orden hám medallardı óz iyelerine saltanatlı túrde tapsırdı.

ÓzA