Qádirli watanlaslar!
Siz, ázizlerdi, kóp milletli pútkil xalqımızdı 8-dekabr – Ózbekstan Respublikası Konstituciyası kúni menen qızǵın qutlıqlap, bársheńizge ózimniń tereń húrmetimdi hám jaqsı tileklerimdi bildiremen.
Bul qutlı áyyyamda barlıq huqıq hám erkinliklerimiz, elimizdegi tınıshlıq hám turaqlılıq, birlik hám awızbirshilik, artqa qaytpaytuǵın demokratiyalıq reformalarımızdıń kepili bolǵan Tiykarǵı nızamımızdıń turmısımızdaǵı ornın hám áhmiyetin jáne de tereń sezinbektemiz.
Hesh gúmansız, xalqımızdıń siyasiy-huqıqıy sana-sezimi hám joqarı erk-ıqrarınıń kórinisi bolǵan Konstituciyamızda mórlep qoyılǵan qaǵıyda hám principler Jańa Ózbekstandı qurıwda bárshemiz ushın sheksiz kúsh-ǵayrat, isenim hám ilham deregi bolıp xızmet etpekte.
Bul haqqında sóz bolǵanda, bárinen burın, jáne de keń wákillik hám juwapkershilikke iye bolǵan milliy parlamentimiz hám birinshi márte jergilikli Keńeslerdiń deputatları arasınan saylanǵan basshılar basshılıq etip atırǵan wálayatlıq Keńesleri, jámiyetlik basqarıwda ornı hám abırayı barǵan sayın artıp atırǵan máhálle institutınıń jumısı mısalında xalıq mámleketlik hákimiyattıń birden-bir deregi ekeni haqqındaǵı konstituciyalıq qaǵıydanıń ámeliy tastıyıǵın kóremiz.
Ásirese, jańa parlamentimiz tárepinen bıyılǵı jılı sudlardıń jumısı jáne puqaralardıń huqıqları menen erkinlikleriniń kepilliklerin kúsheytiwge baylanıslı nızamlar jáne elimizde doslıq, awızbirshilik ortalıǵın bekkemlew, inklyuziv jámiyet, jaslar, hayal-qızlar máseleleri, kem támiyinlengen insanlardıń máplerin qorǵaw, kámbaǵallıqtı qısqartıw, milliy qádiriyatlarımızdı qásterlep saqlaw boyınsha kóplegen áhmiyetli qararlar qabıl etilgenin atap ótiw zárúr.
Jergilikli keńesler de óz aymaqlarındaǵı áhmiyetli sociallıq mashqalalardı sheshiw boyınsha jedel jumıs alıp barmaqta. Olar tárepinen ótken dáwirde 25 mıńnan aslam másele dodalanıp, tiyisli qararlar qabıl etilgeni, lawazımlı shaxslarǵa 14 mıńǵa shamalas deputatlıq sorawlar jiberilgeni de sonnan derek beredi.
Wákillikli uyımlardı haqıyqıy xalıq minberine, xalıq dawısına aylandırıwǵa qaratılǵan reformalarımızdıń dawamı sıpatında 2026-jıldıń 1-yanvarınan rayon hám qalalarda da hákim hám Keńes baslıqlarınıń wazıypaların ayrıqsha ajıratıw boyınsha tiyisli ilajlardı ámelge asıramız.
Bir sóz benen aytqanda, xalıq hákimiyatshılıǵı, wákillik demokratiyası, Konstituciya hám nızam ústinligi sıyaqlı konstituciyalıq principlerge bunnan bılay da sadıq qalıp, bul baǵdardaǵı reformalarımızdı jáne de isenimli dawam ettiremiz.
Húrmetli doslar!
Bizge belgili, sońǵı jılları mámleketimizde insan qádiri, xalıqtıń huqıqları menen máplerin támiyinlew hár qashanǵıdan da úlken áhmiyetke iye bolmaqta. “Konstituciya – insan qádiri, erkinlik, teńlik hám ádillik girewi!” degen iygilikli ideya tiykarında ótkerilip atırǵan bıyılǵı bayram ilajları arqalı bul jolda erisken jetiskenliklerimiz tereń tallanıp, jańa hám áhmiyetli wazıypalar belgilep alınbaqta.
Keyingi waqıtta barlıq taraw hám tarmaqlarda erisip atırǵan nátiyjelerimizge usı kózqarastan baha berip, olardıń tiykarında, bárinen burın, insanıylıq hám xalıqshıllıq principleri jámlengenin hám olar óz nátiyjesin berip atırǵanın ayrıqsha atap ótiw orınlı. Mısallarǵa múrájat etetuǵın bolsaq, bıyıl xalıqtıń jan basına dáramat 3 mıń 500 dollardı quraǵanı, mektepke shekemgi bilimlendiriwge qamtıp alıw 78 procentke, joqarı bilimlendiriwde bolsa 42 procentke jetkeni, adamlarımızdıń ortasha ómir kóriw dárejesi 73,8 jastan 75,1 jasqa sozılǵanı hám basqa da sanlardı keltiriw múmkin.
Konstituciyamızǵa tiykarlanıp mámleketke júklengen sociallıq minnetlemelerdi orınlaw hám elimizde sociallıq mámleket qurıw baǵdarında da úlken jumıslar ámelge asırılmaqta. Atap aytqanda, 1 millionnan aslam puqara kámbaǵallıqtan shıǵarıldı, kámbaǵallıq dárejesi 6,6 procentke túsirildi.
Ekonomikanı turaqlı rawajlandırıw, xalqımız ushın múnásip turmıs dárejesin támiyinlew, bekkem huqıqıy sistema hám ashıq jámiyet qurıw jolındaǵı keń kólemli reformalarımız dúnya jámiyetshiligi tárepinen tán alınbaqta.
Máselen, 2025-jılı Turaqlı rawajlanıw maqsetleri indeksinde Ózbekstan 19 tekshe joqarı kóterilip, Shıǵıs Evropa hám Oraylıq Aziya regionında eń jedel rawajlanıp atırǵan mámleket sıpatında atap ótildi. Globallıq innovaciya indeksinde elimiz Oraylıq hám Qubla Aziya mámleketleri boyınsha kúshli úshlikten orın aldı. “S&P”, “Fitch” hám “Moodyʼs” sıyaqlı abıraylı xalıqaralıq agentlikler tárepinen Ózbekstannıń suveren kredit reytingi kóterildi.
Abıraylı xalıqaralıq ánjuman – YuNESKO Bas konferenciyası sońǵı 40 jıl dawamında birinshi márte Parijden tısqarıda, yaǵnıy, Samarqandta tabıslı ótkerilgeni de dúnya jámiyetshiligi tárepinen áhmiyetli waqıya sıpatında tán alınbaqta.
Áziz hám húrmetli watanlaslar!
Reformalarımız sheshiwshi basqıshqa kirip atırǵan búgingi kúnde biz Konstituciyamızdıń hár bir normasın mámleketlik hám jámiyetlik turmısta ámeliy jumıs ólshemine aylandırıwımız zárúr. Ásirese, jaslarımızǵa Tiykarǵı nızamımızdıń mazmun-mánisin tereń úyretiw, olardı konstituciyalıq qádiriyatlar tiykarında joqarı sanalı hám watansúyiwshi puqaralar, siyasiy oy-pikir hám huqıqıy mádeniyat iyeleri etip tárbiyalaw aldımızda turǵan oǵada áhmiyetli wazıypa bolıp esaplanadı.
Tek ǵana Konstituciya hám nızamlarımızǵa tereń húrmet, puqta huqıqıy bilim hám ámeliy tájiriybe tiykarında biz mámleketlik hám jámiyetlik basqarıwda belsene qatnasıp, Watan hám xalıq aldındaǵı perzentlik minnetimizdi maqtanısh penen orınlay alamız. Sonda ǵana Bas nızamımızdıń ómir baǵıshlawshı kúshi, dóretiwshilik potencialı ámelde jáne de ayqın kórinedi.
Bárshemiz ushın milliy ǵárezsizligimiz, maqtanıshımız tımsalı bolǵan Konstituciyamız ulıǵlanatuǵın bul quwanıshlı áyyyam múnásibeti menen sizlerdi jáne bir márte shın júrekten qutlıqlayman.
Siz, áziz watanlaslarıma bekkem densawlıq, baxıt hám áwmet, shańaraqlarıńızǵa tınıshlıq-tatıwlıq hám abadanlıq tileymen.
Konstituciyamız hám barlıq jetiskenliklerimizdiń dóretiwshisi bolǵan márt hám ullı xalqımız hámiyshe aman bolsın!

Shavkat MIRZIYoEV,
Ózbekstan Respublikası Prezidenti