Energetika tarawında ámelge asırılıp atırǵan iri investiciyalıq joybarlardı nátiyjeli basqarıw, qárejetler ústinen qatań qadaǵalaw ornatıw hám barlıq processlerdi ashıq-aydın tárizde shólkemlestiriw búgingi kúnniń áhmiyetli talaplarınan biri bolıp esaplanadı.

Xalıqaralıq standartlarǵa sáykes mexanizmlerdi engiziw bolsa joybarlarda qáwip-qáterlerdi azaytıw, anıq rejelestiriw hám nátiyjelilikke erisiwde ayrıqsha áhmiyetke iye.

Usı maqsette “Ózbekneftgaz” AJ investiciyalıq jumıstı zamanagóy kózqaraslar tiykarında jolǵa qoyıw ushın “SASOL” kompaniyasınıń tájiriybesi tiykarında islep shıǵılǵan “Stage-Gate” modelin ámeliyatqa engizbekte.

Házirgi waqıtta “UzAssets” AJ tárepinen tastıyıqlanǵan transformaciyanıń “Jol kartası” sheńberinde “Ózbekneftgaz” AJda joybar basqarıwın reformalaw hám bunnan bılay da jetilistiriw jumısları ámelge asırılmaqta. Bul processte “Stage-Gate” metodologiyası joybardıń hár bir basqıshın anıq ólshemler tiykarında bahalaw, qáwip-qáterlerdi aldınnan anıqlaw hám qárejetlerdi optimal basqarıw imkaniyatın beretuǵın mexanizm sıpatında tańlap alınǵan.

Jámiyet málimleme xızmetiniń basshısı Mwmin Ibodovtıń málim etiwinshe, usı jıldıń 24-sentyabr kúni “Ózbekneftgaz” AJ basshılıǵı hám xalıqaralıq abırayǵa iye “SASOL” kompaniyası delegaciyası arasında ótkerilgen ushırasıwda usı metodologiyanı engiziw boyınsha ámeliy birge islesiw máseleleri hár tárepleme dodalanǵan.

– Bul ushırasıwda “SASOL” kompaniyası óziniń kóp jıllıq ámeliyatta sınaqtan ótken joybar basqarıwına baylanıslı tájiriybelerin Ózbekstan tárepi menen bólisiwge tayar ekenin bildirdi. Sonıń menen birge, “Ózbekneftgaz” AJ tárepinen usı model tiykarında investiciyalıq joybarlardı basqarıw tártibin belgileytuǵın jańa reje joybarı islep shıǵıldı. Keshe “SASOL” qánigeleriniń qatnasıwında “Stage-Gate” modelin ámeliy úyreniwge baǵıshlanǵan arnawlı workshop shólkemlestirildi. Ilajda energetika tarawındaǵı jetekshi kompaniyalardıń ámeliyatı, zamanagóy basqarıw kózqarasları hám modeldiń nátiyjelilikke tásiri haqqında tolıq maǵlıwmatlar berildi. Sonday-aq, modeldi “Ózbekneftgaz” AJ jumısına basqıshpa-basqısh engiziw imkaniyatları da tallandı. Keleshekte xalıqaralıq tájiriybeler hám “SASOL” usınısların esapqa alǵan halda modeldi tolıq engiziw boyınsha juwmaqlawshı qarar qabıl etiliwi rejelestirilgen, – dedi ol.

Zamanagóy basqarıw modeliniń engiziliwi “Ózbekneftgaz” AJnıń investiciyalıq jumısın xalıqaralıq standartlarǵa jaqınlastırıp, qárejetlerdiń nátiyjeliligin arttırıwǵa, qáwip-qáterlerdi minimallastırıwǵa hám joybarlardıń nátiyjeliligin joqarı basqıshqa kóteriwge xızmet etetuǵının atap ótiw kerek. Bul tek ǵana kompaniyanıń potencialın bekkemlep qoymastan, al energetika tarawındaǵı reformalardı ámeliy mazmun menen bayıtadı.

N.Ziyodullaeva, ÓzA