Sociallıq tarmaqlarda balalar arasında máwsimlik ótkir respirator viruslı keselliklerge uqsas, biraq ish ótiw hám qusıw simptomları bolǵan infekciya tarqalıp atırǵanı menen baylanıslı xabarlar járiyalanbaqta.

Densawlıqtı saqlaw ministrligi baspasóz xızmeti bul jaǵday boyınsha tómendegilerdi málim etedi:
“Sır emes, hawa-tamshı jolı arqalı juǵatuǵın ótkir respirator viruslı infekciyalar máwsimlik xarakterge iye bolıp, gúzde temperatura tómenlewi menen keselleniw kórsetkishleri bir qansha artadı.
Baqlawlarǵa bola, ayazlaw máwsiminiń baslanıwı ádette avgust ayınıń aqırı hám sentyabr ayına tuwra keledi. Bıyıl bolsa bul múddet biraz keshirek – oktyabr ayınıń sońǵı 10 kúnliginde baslandı. Yaǵnıy bul sociallıq tarmaqlarda aytılıp atırǵanınday, hesh qanday ádetten tıs jaǵday emes.
Geyde respirator belgiler jótel, túshkirik, murın ashıwı, dene temperaturasınıń kóteriliwi menen baqlansa, ayırım nawqaslarda asqazan-ishek sistemasınıń buzılıwı kórinisinde boladı. Demek, bul kesellikler barlıq waqıtta bir qıylı ótpeydi hám bul jaǵday virustıń shtammları menen baylanıslı.
Jáne bir áhmiyetli tárepti umıtpaw kerek. Bir waqıttıń ózinde bakterial hám viruslı infekciyalardıń háwij alıwı baqlanbaydı. Yaǵnıy mikroorganizmler dúnyasında sonday bir process bar, biri ekinshisiniń kóbeyiwine jol qoymaydı.
Máwsimlik respirator keselliklerdiń háwij alıwın koronavirus mutaciyası sıpatında bahalaw da pútkilley orınsız. Qalaberdi, búgingi kúnge kelip COVID-19 ápiwayı respirator infekciyaǵa aylanıp úlgergen. Házirgi waqıtta mámleketimizde koronavirus boyınsha jaǵday turaqlı.
Házirgi waqıtta medicina mákemelerinde ótkir respirator viruslı infekciyalardı emlew ushın zárúr orın-jay hám dári-dármaq rezervi jaratılǵanın atap ótiw kerek. Elimizdegi epidemiyalıq jaǵday turaqlı monitoring etip barılmaqta.
Densawlıqtı saqlaw ministrliginde óz aldına shtab dúzilip, oǵan Sanitariyalıq-epidemiologiyalıq tınıshlıq hám jámiyet salamatlıǵı komitetiniń wákilleri, taraw ilimpazları, sistema juwapkerleri jáne Qaraqalpaqstan Respublikası, Tashkent qalası hám wálayatlardan analıqtı hám balalıqtı qorǵawǵa juwapker qánigeler tartılǵan.
Usı jerde ata-analarǵa kesellik belgileri baqlanǵan perzentlerin óz waqtında shańaraqlıq shıpaker kórigine alıp barıw usınıs etiledi.
Ulıwma, Ózbekstanda epidemiologiyalıq jaǵday turaqlı. Sonıń ushın hesh qanday qáweterge orın joq.”

ÓzA