Bul haqqında Prezident Shavkat Mirziyoevtiń basshılıǵında jasalma intellekt texnologiyaların rawajlandırıw boyınsha bolıp ótip atırǵan videoselektor májilisinde atap ótildi.

– Jasalma intellektti rawajlandırıw tek ǵana zamanagóy infrastruktura hám algoritmlerge emes, al maman kadrlarǵa da baylanıslı. Bul tarawdıń tiykarı – matematika hám informatika. Sonıń ushın, kadrlar tayarlawdı, bárinen burın, mektepten baslaw kerek, – dedi Prezident.
Kelesi oqıw jılınan “Informatika” páni oqıw baǵdarlamalarına jasalma intellektke baylanıslı temalar kirgiziledi. Bunıń ushın Massachusets texnologiyalar institutı menen birgelikte arnawlı sabaqlıq islep shıǵıladı.
“Jańa Ózbekstan” universitetinde jasalma intellekt boyınsha bıyıl 100, kelesi jılı 1 mıń 300 trener-oqıtıwshı tayarlanadı. Olar bolsa kaskad tártibinde mektep hám joqarı oqıw orınlarındaǵı informatika muǵallimlerin oqıtadı. Hár jılı eń jaqsı 100 informatika muǵallimi tap ministrlikler hám hákimliklerdiń potenciallı qánigeleri sıyaqlı jasalma intellekt rawajlanǵan mámleketlerge tájiriybe arttırıwǵa jiberiledi.
“Bir million ózbek programmistleri” joybarınıń logikalıq dawamı sıpatında “Bir million jasalma intellekt jetekshisi” joybarı da baslandı. Bıyıl 100 mıń, kelesi jılı keminde 500 mıń jaslar oqıtıladı.
Joybar menen mektep oqıwshıların da qamtıp alıw áhmiyetli ekenligi atap ótildi. Bunnan bılay hár jılı jasalma intellekt boyınsha milliy tańlaw ótkerilip, eń joqarı nátiyje kórsetken jaslar, olardıń ustazları hám bilimlendiriw shólkemleri múnásip xoshametlenedi.
Onda 500 jas – noutbuk, 100 oqıtıwshı – 1 mıń dollardan sıylıq, 2 bilimlendiriw shólkemi – elektromobil menen sıylıqlanadı.

ÓzA