Elimizde puqaralıq jámiyeti institutları, mámleketlik emes shólkemler jáne xalıqaralıq hám regionallıq strukturalar arasında birge islesiwdi bekkemlew, tájiriybe almasıw hám xalıq diplomatiyasın rawajlandırıw jolında keń kólemli jumıslar ámelge asırılmaqta.

Ózbekstanda Shanxay birge islesiw shólkeminiń Xalıq diplomatiyası orayınıń delegaciyası Qazaqstan Respublikasınıń Astana qalasında “Ádil Qazaqstan: puqaralıq jámiyeti hám mámleket birge islesiwi” súreni astında ótkerilgen XII Puqaralıq forumında belsene qatnastı.
Tashkentte 2023-jıl 14-aprel kúni “Xalıq diplomatiyası – Oraylıq Aziyada tınıshlıq, doslıq hám jaqsı qońsıshılıqtı bekkemlewdiń áhmiyetli faktorı” atamasında regionallıq konferenciya bolıp ótken edi. Onıń sheńberinde Qazaqstan Puqaralıq Alyansı hám Ózbekstanda ShBSh Xalıq diplomatiyası orayı arasında birge islesiw memorandumına qol qoyılǵan edi. Oray Alyans penen túrli tarawlarda birge islesip kelmekte.
Forum sheńberinde shólkemlestirilgen “ShBSh hám xalıq diplomatiyası: global birge islesiw perspektivaları” atamasındaǵı xalıqaralıq konferenciyada Oray direktorı Qobiljon Sobirov ta bayanat penen qatnastı. Ol óziniń shıǵıp sóylegen sózinde búgin puqaralıq jámiyeti institutlarınıń xalıqaralıq birge islesiwi tek ǵana regionallıq turaqlılıqtı emes, al keń kólemli xalıqlar arasındaǵı isenim hám óz-ara túsinisiwdi bekkemlewdiń áhmiyetli faktorı ekenin atap ótti.
ShBSh sheńberinde xalıq diplomatiyasın rawajlandırıw, bul – mámleketler arasındaǵı doslıqtı bekkemlew, jaslar, mádeniyat hám bilimlendiriw tarawlarında jańa birge islesiw joybarların jolǵa qoyıw ekenin atap ótti. Sonıń menen birge, óz-ara birge islesiwdi jáne de nátiyjeli etiw hám keńeytiw maqsetinde ShBSh mámleketleri MKShları arasında birge islesiw platformasın jaratıw, bilimlendiriw hám ilimiy birge islesiwdi keńeytiw, ShBSh universitetleri arasında qospa magistratura hám doktorantura baǵdarlamaları, sanlı texnologiyalar hám jasalma intellekt tarawında arnawlı bilimlendiriw baǵdarlamaların shólkemlestiriw sıyaqlı bir qatar usınıslardı alǵa qoydı.
Máresimde Qazaqstan Respublikası mádeniyat hám málimleme ministriniń orınbasarı Evgeniy Kochetov shıǵıp sóylep, puqaralıq jámiyetiniń búgingi ózgeriwsheń dúnyada insanlardı birlestiretuǵın kúsh ekenligine toqtap ótti.
Sonday-aq, Ázerbayjan Respublikası Mámleketlik emes shólkemlerdi qollap-quwatlaw agentliginiń atqarıwshı direktorı Aytgin Alieva da shıǵıp sóylep, túrkiy mámleketler arasındaǵı mádeniy hám puqaralıq birge islesiw baylanısların rawajlandırıwda jetekshi baslamalar ámelge asırılıp atırǵanın, bul process Túrkiy mámleketler shólkeminiń sammitlerinde de qollap-quwatlanıp atırǵanın atap ótti.
Sırt ellerden 20 ǵa shamalas delegatlar qatnasqan bul forum, Ózbekstan hám Qazaqstan arasında awqamlaslıq qatnasıqları jáne eki mámleket puqaralıq jámiyeti institutlarınıń birge islesiw baylanısların bunnan bılay da keńeytiw hám bekkemlew, sonday-aq, tájiriybe almasıw ushın áhmiyetli platforma wazıypasın atqaradı.

A.RUSTAMOV, ÓzA