“Reuters” ахборот агентлигининг хабар беришича, бугун АҚШ президентининг самолёти Бен-Гурион аэропортига келиб қўнган ва уни Исроил бош вазири Биньямин Нетаньяҳу кутиб олган.

Таъкидланишича, Тель-Авивдаги соҳил бўйида тинчлик келишувига эришишга кўмаклашгани учун Трампга миннатдорчилик сифатида улкан баннер ўрнатилган.

Трамп Исроил парламенти – Кнессетдаги чиқиши арафасида Ғазодаги низо тугаганини эълон қилди.

– Бу мен учун катта шараф. Улуғ ва гўзал кун. Янги ибтидо, – деб ёзган Қўшма Штатлар етакчиси фахрий меҳмонлар китобида. Шунингдек, у Покистон ва Афғонистонни яраштиришга тайёрлигини ҳам истисно этмаган.

Бу вақтда Ҳамас гаровдаги 13 кишини Халқаро қизил Хоч қўмитасига топширди. Исроил эса қамоқхонадаги маҳбусларни қайтаришга ҳозирланмоқда.

Исроил сафаридан сўнг Трамп Мисрнинг Шарм аш-Шайх шаҳрига йўл олади. У ерда Ғазо секторидаги вазиятни тартибга солиш бўйича саммит ўтказилиши режалаштирилган.

Ў.Алимов, ЎзА