Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ózbekstan Sawda-sanaat palatasınıń Qaraqalpaqstan Respublikası basqarmasında mámleketlik baǵdarlamalarǵa kirgizilgen joybarlardıń baslamashıları bolǵan isbilermenler menen ushırastı.

Ushırasıwǵa Kegeyli, Shımbay, Ámiwdárya, Ellikqala, Shomanay, Moynaq hám Nókis rayonlarında jumıs alıp barıp atırǵan isbilermenler hám juwapker basshılar qatnastı.
Onda dáslep Ózbekstan Respublikası Prezidenti tárepinen Qaraqalpaqstanda isbilermenlikti rawajlandırıw, regionnıń investiciyalıq tartımlıǵın arttırıw baǵdarında óz aldına qabıl etilgen qarar hám pármanları tiykarında berilgen jeńillikler, jaratılǵan imkaniyatlar haqqında keń túrde atap ótildi.
Bunnan soń jańa joybarlardı iske túsiriwde ushırasıp atırǵan mashqalalardı anıqlaw hám olardı saplastırıw, investiciyalıq joybarlardı iske qosıw, sanaat ónimlerin islep shıǵarıwshı kárxanalardıń tolıq quwatlıqta islewin támiyinlew boyınsha isbilermenlerdi qıynap kiyatırǵan mashqalalar hám usınıslar tıńlandı.
Ilajda isbilermenlerdi qıynap kiyatırǵan máseleler hár tárepleme kórip shıǵılıp, bildirilgen múrájatlardıń basım kópshiligine ornında sheshimin tabıw ilajları kórildi. Al, waqıt talap etiletuǵın múrájatlar qadaǵalawǵa alınıp, olardı tez pursatta unamlı sheshiw boyınsha tiyisli taraw basshılarına tapsırmalar berildi.

Qaraqalpaqstan xabar agentligi