Xalıq deputatları Nókis qalalıq Keńesindegi Ózbekstan Liberal-demokratiyalıq partiyası deputatlıq toparınıń májilisinde “Qaraqalpaq suw támiynatı” akcionerlik jámiyeti Nókis qalalıq filialı tárepinen qala xalqın taza ishimlik suwı menen támiyinlew maqsetinde ámelge asırılıp atırǵan jumıslar boyınsha usınılǵan esabatı tıńlandı. Májiliste filial baslıǵı K.Sadikov qatnasıp, 2025-jıldıń yanvar-iyul ayları dawamında ámelge asırılǵan jumıslar, bar mashqalalar hám keleshektegi rejeler haqqında tolıq málimleme berdi.

Nókis qalası xalqınıń 99,9 procenti yamasa 344,4 mıń adam oraylasqan ishimlik suwı tarmaqları menen támiyinlengen. Suw támiynatı úsh tiykarǵı obekt – VOS-Nókis, URV-1 hám URV Qızketken arqalı ámelge asırılmaqta. Jámi suw tarmaqlarınıń uzınlıǵı 729,9 km bolıp, sonnan 112,2 km – iri suw tarmaqları, 617,7 km bolsa jergilikli tarmaqlar bolıp esaplanadı. Filial tárepinen 2025-2026-jıllardıń gúzgi-qısqı máwsimine tayarlıq sheńberinde 500 pogon metr kapital ońlaw hám 4600 pogon metr aǵımdaǵı ońlaw jumısları rejelestirilgen bolıp, usı jıldıń 7 ayında sonnan 150 p/m kapital hám 1500 p/m aǵımdaǵı ońlaw jumısları ámelge asırıldı.

Prezident qararına muwapıq, “Suw támiynatı hám aqaba suw sistemaların rawajlandırıw” qorı esabınan 47 mlrd 371 mln sumlıq qarjı esabınan “Jeke terek” máhállesinde jaylasqan VOS-Nókis suw tazalaw imaratında rekonstrukciya jumısları alıp barılmaqta. Sonday-aq, qala hákimligi tárepinen ajıratılǵan qarjılar esabınan 11 máhállede 11,48 km ishimlik suw tarmaqların qayta qurıw jumısları ámelge asırılmaqta.

Usı jıldıń 7 ayında 1051 qısqa nomeri arqalı dispetcherlik xızmetine 565 avariyalıq jarılıw boyınsha múrájat kelip túsken bolıp, barlıǵı óz waqtında saplastırılǵan. Aqaba suw xızmeti bólimine bolsa 2128 múrájat kelip túsken hám olar da tolıq sheshilgen. Sonday-aq, 8 dana nasos agregatında ońlaw jumısları alıp barıldı. Filial tárepinen 79 904 abonentke xızmet kórsetilmekte, biraq debitor qarızdarlıq muǵdarı 9 mlrd 419 mln sumdı quramaqta.

Májilis dawamında deputatlar esabat boyınsha óz pikir-usınısların bildirip, bar mashqalalardı saplastırıw boyınsha usınısların alǵa qoydı. Sonıń ishinde, debitorlıq qarızdarlıqtı qısqartıw, xalıqqa kórsetilip atırǵan xızmetlerdiń sapasın arttırıw, ońlaw jumısların sistemalı shólkemlestiriw zárúr ekenligi atap ótildi.

Qaraqalpaqstan xabar agentligi