Óz miyneti hám sabır-taqatı menen jerge mehir qoyǵan insanlar awıl xojalıǵınıń haqıyqıy súyenishi esaplanadı. Olar tek ǵana shańaraǵın emes, al jergilikli bazarlardı da tábiyǵıy ónimler menen támiyinlep, payda da kórmekte. Beruniy rayonındaǵı usınday pidayı insanlardıń biri – 73 jasar Yangiboy ata Rwzimov.

Gúlistan máhállesinde jaylasqan 7 sotıxlıq qıytaq jerinde ol 30 dan aslam miyweli terek túrlerin tárbiyalap kelmekte. Onıń baǵında júzim, alma, anar, ánjir, shabdal, almurt, chereshnya, qurma, badam hám ǵoza sıyaqlı miywe túrleri bar. Hár bir daraqtan payda alıp atırǵan Yangiboy ata búgin tek ǵana miywelerdi jetistiriw emes, al onıń barlıq processlerin yadtan biledi, – dep maǵlıwmat beredi rayon hákimliginiń Málimleme xızmeti bólimi.
Miywelerden alınıp atırǵan ónim tek ǵana shańaraǵı ushın emes, al máhálledegi basqa da puqaralar ushın da úlgili tájiriybe bolmaqta. Ol miynetten sharshamaydı, qıytaq jerdegi jumıslarǵa perzentleri menen aqlıqların da tartıp, óziniń bilim hám kónlikpelerin olarǵa úyretpekte.
Bunday ápiwayı turmıslıq mısallar arqalı jergilikli xalıqtıń miynetke bolǵan múnásibeti, óz jerinen nátiyjeli paydalanıwǵa bolǵan umtılısı ayqın kózge taslanadı.

Qaraqalpaqstan xabar agentligi