«Áhmiyetli 90 kún” joybarı sheńberinde studentlerdiń dem alıs waqıtların mazmunlı shólkemlestiriw maqsetinde hár qıylı ilajlar dawam etpekte.

Qaraqalpaqstan awıl xojalıǵı hám agrotexnologiyalar institutınıń student-jasları ushın da umıtılmas mádeniy dem alıs kúni shólkemlestirildi.
Ilaj ishki turizmdi rawajlandırıw, jaslardı elimiz boylap dıqqatqa ılayıqlı tariyxıy orınlar hám sulıw tábiyatı menen tanıstırıw maqsetinde ótkerildi. Student-jaslar Taxtakópir rayonındaǵı Dáwqara awıl puqaralar jıyını aymaǵında jaylasqan «Qaratereń» ekoturizm kompleksine bardı.
Bul kól elimiz tábiyatınıń biytákirar gózzallıǵı, milliylik hám zamanagóylik úylesken orınlardan biri. Bul gózzal kórinislerden zawıqlanǵan studentler tek ǵana tábiyat gózzallıǵınıń tartımlılıǵın sezip qalmay, milliy dástúrler hám qádiriyatlar menen jaqınnan tanıstı.
Ilaj dawamında jaslar ushın watansúyiwshilik, ekologiyalıq mádeniyat, milliy miyrasqa húrmet sıyaqlı pazıyletlerdi rawajlandırıwǵa xızmet etetuǵın qızıqlı bayanatlar hám sóylesiwler shólkemlestirildi.
Turizmdi, ásirese, ishki turizmdi rawajlandırıw boyınsha respublikamızda bir qatar ilajlar ámelge asırılmaqta. Sońǵı jıllarda usı kól átirapında sayaxatshılar ushın qolaylıqlar jaratıw boyınsha ámelge asırılǵan jumıslar bul jerge sayaxatqa keliwshilerdiń sanın arttırmaqta.
Prezidentimizdiń baslaması menen Qaratereń kóli boyında jańadan qurılǵan, hesh jerde uqsası joq milliy kolorittegi «Qaratereń» etno-turistlik kompleksiniń qurılıwı xalqımızdıń milliy miyraslarına, tariyxına degen húkimetimizdiń ayrıqsha itibarı ekenliginen dárek beredi.
Jaslar usı kól, etnoawıl haqqında maǵlıwmatlar alıp, qatar turǵan qara úylerdi tamashalap, tawǵa kóterilip sayaxat etip, súwretlerge túsip kewilli dem aldı.
Álbette, jaslardıń erteńgi aydın keleshegin bekkemlewde, sonday-aq, Watansúyiwshilik ruwxında tárbiyalawda mine, usınday ilajlardıń tutqan ornı áhmiyetli. Institut basshıları, bunday mádeniy sayaxatlar studentlerdiń dúnyaǵa kózqarasın keńeytiw, dóretiwshilik hám ruwxıy potencialın arttırıwda úlken áhmiyetke iye ekenin atap ótti.

Qaraqalpaqstan xabar agentligi