Prezident Shavkat Mirziyoev mádeniyat hám kórkem óner tarawında basqarıwdı jetilistiriw, ónermentshilikti rawajlandırıw boyınsha usınıslardıń prezentaciyası menen tanıstı.

Xalqımızdıń úlken ruwxıy miyrası bar. Búgingi kúnde adamlardıń intellektuallıq, estetikalıq hám mádeniy talapları turaqlı artıp barmaqta. Sol sebepli mádeniyat tarawında basqarıw hám qarjılandırıwdı jetilistiriw, bul baǵdarda aldınǵı sırt el tájiriybesin engiziw názerde tutılmaqta.

Atap aytqanda, mádeniyat oraylarında mámleketlik-jeke menshik sheriklik jolǵa qoyılıp, dóretiwshilik qollanbalardı xoshametlewshi startap joybarlar ámelge asırıladı. Jaslarda watansúyiwshilik sezimin kúsheytetuǵın, Ózbekstan brendin jaratatuǵın tariyxıy, ilimiy hám animaciyalıq milliy ónimler qollap-quwatlanadı.

Mámleketimiz basshısı tarawda aldınǵı sırt el tájiriybesin basqıshpa-basqısh engiziw boyınsha kórsetpe berdi.

Bizge belgili, Ózbekstan Prezidentiniń qararı menen Batır Zakirov atındaǵı Milliy estrada kórkem óneri institutı shólkemlestirilgen edi. Endi kórkem óner ǵayratkeriniń memorial muzeyin shólkemlestiriw, Batır Zakirov atındaǵı stipendiyanı engiziw, xalıqaralıq estrada tańlawın ótkeriw rejelestirilgen. Instituttıń bakalavriat basqıshın tamamlaǵan eń belsendi pitkeriwshiler sırt elge magistraturada oqıwǵa jiberiledi hám qábiletli studentlerdiń abıraylı xalıqaralıq tańlawlarda qatnasıwı qollap-quwatlanadı.

Mámleketimiz basshısı Ándijan wálayatına saparı dawamında xalıq artisti Sherali Jwraevtıń esteligin máńgilestiriw baslamasın bildirgen edi. Soǵan muwapıq, Ándijan qalasındaǵı kórkem óner mektebi negizinde dóretiwshi atındaǵı muzıka hám kórkem óner joqarı mektebi shólkemlestiriledi. Hár jılı Sherali Jwraev atındaǵı milliy qosıqshılıq teletańlawı ótkeriledi.

Joqarı mektepte ilimiy-dóretiwshilik laboratoriya dúzilip, Sherali Jwraev qosıqlarınıń “altın fondı” jaratıladı. Zamanagóy dawıs jazıw hám súwretke alıw studiyası shólkemlestirilip, talantlı jas dóretiwshiler onnan jeńilletilgen túrde paydalanıwı múmkin boladı.

Házir elimizde Ózbekstan mámleketlik simfoniyalıq orkestri hám filarmoniya quramında 8 professional orkestr jumıs alıp barmaqta. Biraq olar tek ǵana Tashkent qalasında, respublika dárejesindegi ilajlarda qatnasadı.

Sol sebepli bunday orkestrlerdi orınlarda da basqıshpa-basqısh shólkemlestiriw rejelestirilgen. Sonıń ishinde, Ferǵana wálayatında simfoniyalıq orkestr hám milliy saz-ásbaplar orkestri dúziledi. Olar kerekli muzıka ásbapları, dawıs kúsheytiw hám jaqtılandırıw úskeneleri, saxna lipasları hám basqa da úskeneler menen támiyinlenedi.

Mámleketimiz basshısı milliy hám jáhán kórkem óneriniń saylandı dóretpelerin xalıqqa tereń jetkeriw, rayon hám qalalarǵa gastrol saparların shólkemlestiriw kerek ekenligin atap ótti.

Mádeniyatı bay hám ráńbáreń elimizde kreativ ekonomika rawajlanıwı ushın oǵada keń imkaniyatlar bar. Búgingi kúnde bul tarawda 14 mıń kárxana jumıs alıp barmaqta, olarda derlik 100 mıń adam islemekte. Kelesi 5 jılda kreativ ekonomika kólemin 2 esege kóbeytiw, jalpı ishki ónimdegi úlesin 5 procentke jetkeriw maqset etilgen.

Ótken jılı bul baǵdarda nızam qabıl etildi. Tashkentte Kreativ ekonomika boyınsha tórtinshi pútkil jer júzilik konferenciya ótkerildi. YuNESKO, YuNKTAD, Jáhán intellektuallıq múlk shólkemi sıyaqlı xalıqaralıq strukturalar, Franciya, Italiya, Indoneziya, Saudiya Arabstanı, Qatar sıyaqlı mámleketler menen keńnen birge islesiw jolǵa qoyıldı.

Kreativ industriyanıń eń úlken tarawlarınan biri – ónermentshilik. Jıldıń ótken dáwirinde bunday ónimlerdiń eksportı  6,5 million dollardı quradı.

Prezentaciyada ónermentshilikti jáne de rawajlandırıwǵa qaratılǵan usınıslar kórip shıǵıldı. Sonıń ishinde, Ullı Britaniya Patshalıq fondı menen birgelikte Tashkent qalasında akademiyalıq platforma jaratıw rejelestirilgen. Ol arqalı magistrler tayarlaw, izertlewler ótkeriw, oqıw qollanbaların engiziw jolǵa qoyıladı. Bul platforma menen 3 mıńnan aslam qábiletli ónerment basqıshpa-basqısh qamtıp alınadı. Keyin ala onı ámeliy kórkem óner mektebine aylandırıw názerde tutılǵan.

2023-jılı Buxara “Ónermentshilik hám xalıq kórkem óneri” baǵdarında YuNESKOnıń kreativ qalalar tarmaǵına kirgizilgen edi. Ol jerde 2 mıń ónerment 36 baǵdarda dóretiwshilik etedi.

Sentyabr-noyabr aylarında Buxarada birinshi zamanagóy kórkem óner biennalesi ótkeriledi. Oǵan 40 mámleketten 70 ataqlı xudojnik keledi.

Mámleketimiz basshısı mádeniy turizmdi rawajlandırıwǵa úlken túrtki beretuǵın bunday iri ilajlardı joqarı dárejede shólkemlestiriw áhmiyetli ekenligin atap ótti.

Turizm boyınsha jáne bir potenciallı aymaq – Qaraqalpaqstan. Házir ol jerde 2 mıń jas milliy ónermentshilik penen professional shuǵıllanbaqta. Jáne kópleri usı kásiplerdi iyelewdi qáleydi.

Sol sebepli Nókistegi “Istiqlol” baǵın kreativ klasterge aylandırıp, onda ónermentler hám dizaynerlerge dástúriy bilim hám innovaciyalıq ideyalardı birlestirgen halda bilim beretuǵın Aral mektebin shólkemlestiriw mólsherlengen.

Juwapkerlerge joybarlardı sapalı orınlaw hám ilajlardı joqarı dárejede ótkeriw boyınsha kórsetpeler berildi.

ÓzA