Balalıqtan baslap insan salamatlıǵına qanshelli itibar berilse, bul álbette keleshekte óz jemisin beredi. Sebebi insan balalıqta nege úyretilse, ómirine úlken imkaniyatlar jaratıladı. Mámleketimizde ana hám bala salamatlıǵın qorǵawǵa ayrıqsha itibar qaratılıp, bul baǵdarda keń kólemli jumıslar alıp barılmaqta.

Xojeli rayonındaǵı Respublikalıq balalar ftiziatriya sanatoriyası házirgi waqıtta balalarda kóp ushırasatuǵın Mycobacterium tuberculosis infectio (xalıq tilinde – tuberkulyoz) keselligine qarsı gúresiwde óz jumısın alıp barmaqta. . Bul sanatoriya 2023-jılı jumıs baslaǵan. Dáslep 80 orınlıq bolǵan bolsa, házirgi waqıtta ol jerde 100 den aslam bala emlenbekte. Sanatoriya tek ǵana keselliktiń aldın alıwǵa qánigelesken. Ol jerge juqpalı kesellikke shatılǵan balalar emes, al usı kesellikke shatılǵan adamlar menen baylanısta bolǵan balalar emlenedi. Balalar jaylastırılǵannan soń, shıpakerler tárepinen testler hám analizler alınıp, olarǵa sáykes vitaminler hám dári-dármaqlar usınıs etiledi. Sanatoriyada barlıq sharayatlar jaratılǵan. Balalarǵa kúnine 5 mezgil awqat hám vitaminler beriledi. Bunnan tısqarı, oqıw procesi de jolǵa qoyılǵan bolıp, 11-klassqa shekem bilim beriledi. Tiykarınan 5 jastan 17 jasqa shekemgi balalar bul jerde emlenedi.
-Kesellikti emlewden kóre, onıń aldın alǵan abzal. Biz ushın balalar salamatlıǵı júdá áhmiyetli. Sol sebepli olarǵa óz perzentimizdey mehir menen qaraymız, – deydi sanatoriyanıń bas shıpakeri Genjemurat Babajanov. Bul jerde emlenip atırǵan balalar menen sáwbetleskenimizde sanatoriyada jaratılǵan sharayatlar haqqında unamlı pikirlerin bildirdi. -Men bul jerge kelgende dene salmaǵım 30 kg edim, jaqsı em alǵanlıǵım ushın aradan kóp waqıt ótpesten 35 kg boldım. Bul sanatoriya maǵan júdá unaydı, ustazlarımız hám shıpakerlerimiz júdá mehriban,-deydi on úsh jasar Nursultan ismli bala.
Balalar sanatoriyada túrli sport dógereklerine qatnasıp, futbol, jeńil atletika, shaxmat-shashka sport túrleri menen shuǵıllanıp kelmekte.
– Bul jerdegi zamanlaslarıma qosılıp, futbol menen shuǵıllanıp, mende futbolshı bolıw ármanı payda boldı. Úlkeygenimde futbolshı bolaman,-deydi 8 jasar Miyriman ismli bala.
Juwmaqlap aytqanda, sanatoriyada jaratılǵan sharayatlar, mehirli ortalıq, salamat awqatlanıw hám tájiriybeli shıpakerlerdiń járdemi sebepli balalar tek ǵana salamatlıǵın tiklep emes, al arzıw-niyetlerine qaray isenimli qádem taslamaqta. Bunday orınlar – balalardıń salamat turmısı, baxıtlı balalıǵı hám aydın kelesheginiń girewi bolıp esaplanadı. Sebebi, salamat bala – salamat jámiyettiń tiykarı.
Gúlshada Kayratbaeva, Berdaq atındaǵı QMU qaraqalpaq filologiyası hám jurnalistika fakultetiniń 1-kurs studenti.

Qaraqalpaqstan xabar agentligi