Muhammed al-Xorezmiy atındaǵı qánigelestirilgen mekteptiń Nókis filialı respublikamızdaǵı eń sońǵı ashılǵan zamanagóy mekteplerdiń biri bolıp, bul mektep Ózbekstan Respublikası Prezidentiniń 2024-jıl 1-apreldegi «Qánigelestirilgen mektepler tarmaǵın keńeytiw hám olardıń jumısın bunnan bılay da jetilistiriw haqqında»ǵı Pármanı tiykarında shólkemlestirildi.

Mektepte  oqıwshılarǵa matematika, informatika, fizika hám inglis tili pánleri tereńlestirilgen halda oqıtıladı.

Sonday-aq, mektepte  eń zamanagóy kompyuter xanaları, ximiya, biologiya, fizika laboratoriyaları hám robototexnika, IT dógerekleri de bar bolıp oqıwshılardıń teoriyalıq bilimleri ámeliy jaqtan bekkemlenedi.

Juwmaqlanıp atırǵan oqıw jılında bul mektepti 32 oqıwshı pitkerip shıqpaqta. Elimizdegi barlıq mekteplerde bolǵanı sıyaqlı, «Ilim – eń ullı maqtanısh» súreni astında «Sońǵı qońıraw» ilajı bul mektepte de saltanatlı túrde bolıp ótti.

Ilajǵa Qaraqalpaqstan Respublikası Ministrler Keńesiniń Baslıǵı F.Ermanov qatnastı hám Prezidentimizdiń mekteplerdi pitkeriwshi ul-qızlarǵa jollaǵan qutlıqlawın oqıp esittirdi.

Sonday-aq, Ministrler Keńesiniń Baslıǵı úlgili, belsendi oqıwshılarǵa hám olardı kamalǵa keltirgen ata-analarına, olarǵa bilim bergen muǵallimlerge minnetdarshılıq bildirdi.

-Mektebimizdi 2024-2025-oqıw jılında 32 oqıwshı pitkerip atırǵan bolsa, solardan 1 oqıwshı sırt ellerdegi 14 joqarı oqıw ornına, 2 pitkeriwshi sırt ellerdiń elimizde jaylasqan joqarı oqıw orınlarınıń filiallarına grant tiykarında oqıwǵa qabıllandı,-deydi mektep másláhátshisi Qutlımurat Maqsetov.-26 pitkeriwshimiz bolsa, inglis, matematika, fizika, biologiya, ximiya, tariyx pánleri boyınsha xalıqaralıq hám milliy sertifikatlardı qolǵa kirgiziwge miyasar boldı. Aldaǵı waqıtları, bizler bul pitkeriwshilerimizden úlken úmitler kútip otırmız. Pursattan paydalanıp, barlıq pitkeriwshilerdi mektepti tabıslı tamamlaǵanı menen qutlıqlap, olarǵa haq jol tilep qalaman.

Saltanatlı ilaj mektep oqıwshılarınıń qızıqlı koncert baǵdarlaması menen kewilli dawam etti.

Adilbay Orazov,

Qaraqalpaqstan xabar agentligi sholıwshısı.