Ózbekstan Respublikası Ministrler Kabinetiniń 2022-jıl 18-yanvardaǵı «Aral teńiziniń suwı qurıǵan ultanında «Jasıl qaplamalar» – qorǵanıw toǵaylıqların payda etiwdiń qosımsha ilajları haqqında»ǵı qararı menen 2022-2026-jıllar dawamında Aral teńiziniń suwı qurıǵan aymaqlarında hár jılı 100 mıń gektar jerge «jasıl qaplamalar» – qorǵanıw toǵaylıqların payda etiw belgilengen edi.

2024-jıldıń qısqı-báhárgi máwsimlerinde jámi 112 mıń 502 gektar jer maydanına toǵay melioraciyalıq jumısları ámelge asırılǵan bolıp, sonnan 109 mıń 443 gektarında tuqımnan (70 mıń 50 gektarına samolyot, 39 mıń 393 gektarına texnika), 3059 gektarında nál egiw arqalı toǵaylıqlar payda etildi.
– Bul jumıslardı ámelge asırıwda toǵay xojalıqlarınan 1000 jumısshı xızmetker, 200 texnika, 2 AN-2 samolyotı, 4 deltaplan hám basqa da texnikalar menen mexanizmler iske qosıldı,-deydi Moynaq mámleketlik toǵay xojalıǵı direktorı wazıypasın waqtınsha atqarıwshısı A.Bekmuratov.
Prezidentimizdiń 2023-jıl 23-noyabrdegi «Respublikada jasıllıq dárejesin jáne de arttırıw, «Jasıl mákan» ulıwma milliy joybarın basqıshpa-basqısh ámelge asırıw arqalı ekologiyalıq turaqlılıqtı támiyinlew ilajları haqqında»ǵı qararınıń orınlanıwın támiyinlew boyınsha Toǵay xojalıǵı fondı jerlerine 2024-jılǵı báhár máwsiminde Moynaq rayonı aymaǵında 109 mıń nál egiw rejesi belgilengen edi. Sonnan, Moynaq mámleketlik toǵay xojalıǵı tárepinen 45 mıń túp shól ósimlikleriniń náli toǵay xojalıǵı fondına tiyisli jerlerge egildi.
Moynaq máleketlik toǵay xojalıǵı tárepinen 2024-jılı jámi 36 kárxana menen 68 mıń 495 túp nál hám qálemshelerge shártnama dúzildi. Shártnamanıń bahası 142 million 669 mıń sumdı quraydı. Sonnan 24 mıńnan aslam nál hám qálemsheler jetkerip berildi.
Ózbekstan Respublikası Ministrler Kabinetiniń 2024-jıl 7-marttaǵı «Bıyılǵı báhárgi hám gúzgi máwsimlerde kóklemzarlastırıw, sayamanlı, miyweli terek hám putaq nálleri hám qálemshelerdi egiw ilajların sistemalı, tártipli túrde shólkemlestiriw haqqında»ǵı biyligi hám Toǵay xojalıǵı agentliginiń sáykes kórsetpelerine muwapıq Moynaq mámleketlik toǵay xojalıǵı tárepinen 14 kárxana menen 36 mıń 595 túp nál hám qálemshelerdi biypul jetkerip beriwge, mekteplerge 4659 dana qálemshe hám mektepke shekemgi bilimlendiriw shólkemlerine 2416 túp nál biypul jetkerip berildi.
Maǵlıwmat ushın, Ótken 6 jıl dawamında Aral teńiziniń qurıǵan 1 million 865 mıń 350 gektarlıq jer maydanında toǵay-melioraciyalıq jumısları ámelge asırılǵan. Sonnan, 1 million 782 mıń 953 gektarlıq maydanda tuqımnan (1360313 ga. samolyot, 422640 ga. texnika járdeminde), 82 mıń 397 jer maydanda nálden toǵaylıqlar payda etilgen.
Oǵan jámi 6 million 944 mıń 976 kilogramm shól ósimlikleriniń tuqımları jumsalǵan. Sonnan 4 million 479 mıń 774 kilogramm seksewil, 665 mıń 624 kilogramm qándim, 5000 kilogramm cherkez, 1 million 685 mıń 556 kilogramm qarabaraq hám 109 mıń kilogrammnan aslam basqa túrdegi shól ósimlikleriniń tuqımları tayarlanǵan.

Á.Jiyemuratov,
Qaraqalpaqstan xabar agentligi