Ellikqala rayonı “Paxtachi” mákan puqaralar jıyınında “Máhállede bir kún” joybarı sheńberinde bir qatar ilajlar ótkerildi.

Onda rayon hákiminiń orınbasarı, Shańaraq hám hayal-qızlar bóliminiń baslıǵı A.Yuldasheva, Ruwxıy-aǵartıwshılıq orayınıń baslıǵı A.Matniyazova hám bir topar máhálle hayal-qızları, kárxana hám shólkemlerdiń basshıları belsene qatnastı, – dep maǵlıwmat beredi Tórtkúl rayonı hákimligi Málimleme xızmeti bólimi.
Dáslep joybar qatnasıwshıları “Bes mıń qádem” júriw marafonı hám azanǵı dene tárbiya shınıǵıwların ótkerdi. MPJ imaratında máhálledegi úlgili shańaraq wákilleri menen sáwbet, “Insan sociallıq xızmetler orayı,” ishki isler uyımları wákilleri tárepinen máhálledegi mashqalalı hám qorǵaw orderin alǵan hayal-qızlar menen óz-ara sáwbet ótkerildi.
Ádillik, PHAJ, yuristler, psixologlar tárepinen jas shańaraqlardı shańaraqlıq turmısqa tayarlaw boyınsha oqıw seminarları shólkemlestirildi. Qatnasıwshılar seminar dawamında ózlerin qızıqtırǵan sorawlarǵa qánigelerden juwap aldı.
Sonday-aq, xalıq arasında ruwxıy-aǵartıwshılıq ortalıqtı keńnen úgit-násiyatlaw, xalıqtı salamat turmıs tárizine tartıw boyınsha shólkem basshıları tárepinen hayal-qızlar menen dógerek sáwbetleri shólkemlestirilip, máhálledegi hayal-qızlar medicinalıq tekseriwden ótkerildi.
Joybar sheńberinde hayal-qızlardı kitapqumarlıqqa tartıw, ónermentler kórgizbesi, hayal-qızlardıń bántligin támiyinlew boyınsha miynet yarmarkası shólkemlestirilip, bank xızmetkerleri tárepinen jeńilletilgen kreditler, subsidiyalar alıw tártipleri hayal-qızlarǵa túsindirildi.

Qaraqalpaqstan xabar agentligi