Ózbekstan Respublikası Prezidentiniń 2024-jıl 26- avgusttaǵı “Puqaralıq jámiyeti institutların mámleket tárepinen qollap-quwatlaw sistemasın jáne de jetilistiriw ilajları haqqında”ǵı pármanında belgilep qoyılǵanınday, puqaralıq jámiyeti wákilleriniń hár jılı mámleketlik grantı hám mámleketlik sociallıq buyırtpalar tańlawlarında qatnasıwında járiyalılıqtı támiyinlew wazıypası belgilengen.

Usı múnásibet penen birden-bir onlayn platforma islep shıǵılǵan edi. Bul platformada mámleketlik grantlar hám mámleketlik sociallıq buyırtpalardı tapsırıw hám olardı kórip shıǵıw tártibi tastıyıqlandı.
Nókis qalasındaǵı «Mámleketlik emes kommerciyalıq emes shólkemler úyi» májilisler zalında «Mámleketlik grant, mámleketlik sociallıq buyırtpalar tańlawında onlayn platforma arqalı arza tapsırıw» atamasında oqıw-seminarı bolıp ótti.
Bul oqıw-seminarı Ózbekstan mámleketlik emes, kommerciyalıq emes shólkemleri milliy associaciyası Qaraqalpaqstan Respublikası aymaqlıq bólimi hám Ózbekstan Respublikası Oliy Majlisi janındaǵı jámiyetlik fondı Qaraqalpaqstan Respublikası bólimi menen birgelikte shólkemlestirildi.
Oqıw-seminarına puqaralıq jámiyeti institutları hám ǵalaba xabar qurallarınıń wákilleri qatnastı.
-Seminardan gózlengen maqset, puqaralıq jámiyetleriniń birden-bir onlayn platforması arqalı hújjetlerin tapsırıw shártleri, hújjetlerdi qalayınsha júklep alıw hám jiberiw qaǵıydasın túsindiriwden ibarat,-deydi Ózbekstan mámleketlik emes kommerciyalıq emes shólkemleri milliy associaciyası Qaraqalpaqstan Respublikası aymaqlıq bólimi qánigesi Rasul Qudiyarov.
Seminarda Ózbekstan Respublikası Oliy Majlisi janındaǵı jámiyetlik fondı Qaraqalpaqstan Respublikası bólimi baslıǵı Paraxat Turdımuratov tárepinen mámleketlik grant, mámleketlik sociallıq buyırtpalar tańlawında onlayn platforma arqalı arza tapsırıw tártipleri boyınsha qatnasıwshılarǵa keń túrde túsinikler berildi.
Sonday-aq, seminar dawamında 2025-jılı ámelge asırılıwı kútilip atırǵan joybarlar tuwralı maǵlıwmatlar da berildi. Oqıw-seminarı óz-ara pikirlesiwler menen qızǵın dawam etip, qatnasıwshılar ózlerin qızıqtırǵan sorawlarına juwap aldı.

Adilbay Orazov,
Qaraqalpaqstan xabar agentligi sholıwshısı.