Press-tur

Orınlarda ashıq-aydınlıqtı támiyinlew hám sociallıq-ekonomikalıq tarawda júz berip atırǵan ózgerisler, jetiskenlikler menen qáte-kemshililerdi keń jámiyetshilikke tanıstırıw maqsetinde ǵalaba xabar qurallarınıń qatnasıwında press- turlar shólkemlestirilip kelinbekte.

Qaraqalpaqstan Respublikası Joqarǵı Keńesi Baslıǵınıń tapsırmasına muwapıq, Qaraqalpaqstan Respublikası Ministrler Keńesi, Ózbekstan jurnalistler awqamı Qaraqalpaqstan bólimi hám Taqıyatas rayonı hákimligi menen birgelikte Taqıyatas rayonında press-tur shólkemlestirildi. Onda ǵalaba xabar quralları wákilleri qatnasıp, orınlarda bolıp, mámleketimiz tárepinen jaratılıp atırǵan imkaniyatlar, olardan nátiyjeli paydalanıp atırǵan jaslar turmısı, sport, qurılıs tarawındaǵı islenip atırǵan jumıslar, jumıssız jaslardıń ózin-ózi bánt etip, shańaraǵına qosımsha dáramat kirgizip atırǵanlıǵı hám abadanlastırıw jumısları menen tanıstı.
Biz rayonda bolǵanımızda dáslep sport mektebiniń birinshi bazasında bolıp, ol jerdegi sporttıń Djiu-jditsu sport túri menen shuǵıllanıp atırǵan sportshı balalardıń turmısı menen tanıstıq. Keń hám hawalı, zamanagóy jaqsı sport zalda trenerleriniń basshılıǵında shınıǵıwlar alıp barıp atırǵan sportshı jaslar, ásirese erteńgi kelesheginen úmit kúttiretuǵın kishkene balalar hár qanday adamnıń itibarın tartpay qalmaydı. Kórinisinen ǵayratlı, chempionatlarda qarsılaslarına hesh qanday pursattı qoldan bermey, jarıslarda elimiz bayraǵın bálentlerge kóterip júrgen chempion jaslardı usı zalda kórgenimizden quwanıshqa bólendik.
-Sport mektebizimizde «Baslamalı byudjet» esabınan kapital ońlaw jumısları alıp barılıp, paydalanıwǵa tapsırıldı. Milliy gúres hám djiu-jditsu sport túrinen 500 den aslam sportshı jaslar sport penen turaqlı shuǵıllanıp kelmekte. Olarǵa tájiriybeli trenerlerimiz Jasur Tajibaev, Orınbay Orazımbetov, Zamir Qurbanbaev, Qudaybergen Nawrızbaev, Begzat Jullibaev, Rasul Xaytekov, Jasmina Azatovalar sport sırların úyretip kelmekte,-deydi sport mekteptiń metodisti Alımbay Raximov.
Sońǵı waqıtlarda mámleketimiz tárepinen jumıssız jaslardıń bántligin támiyinlew ushın imkaniyatlar jaratılıp, olarǵa óz bizneslerin baslaw ushın subsidiyalar ajıratılıp, jeńilletilgen kreditler berilmekte. Usınday imkaniyatlardan nátiyjeli paydalanǵan rayondaǵı «Abat mákan» MPJda jasawshı Xaytbaev Maxsud hám Dilnaza Muratovanıń shańaraǵında bolıp, olardıń úy qaptalındaǵı ıssıxanada gúl ósirip, onnan mol dáramat tawıp atırǵanlıǵı hám shıraylı gúller álemi menen tanıstıq.
-Gúl dúkanımızǵa dáslep sırttan buyırtpa tiykarında gúllerdi aldıratuǵın edik. Soń ómirlik joldasım menen oylasıp, jeńilletilgen kredit alıp, úy qaptalı qıytaq jerimizden ıssıxana qurıp gúllerdi ózlerimiz egip, jetistirip, gúl dúkanımızda sata basladıq. Házirgi waqıtta ıssıxanamızda gúllerdiń 15 ten aslam túri bar. Tiykarınan roza gúliniń úsh túrin jetistirip atırmız. Limon, qurma daraǵımız da miywe beriw aldında tur. Dáramatımız jaqsı. Bir kúnlik dáramatımız 700, 800 mıń sumdı quraydı,-deydi Dilnaza Muratova.
«Nurlı keleshek» APJ Taqıyatas rayonınıń eń shetki aymaqlarınıń biri. Biz ol jerde bolǵanımızda Ózbekstan Respublikası Prezidentiniń 2021-jıl 18-sentyabrdegi «Islam rawajlanıw banki hám OPEK xalıqaralıq rawajlanıw qorınıń qatnasıwında» Awıllıq jerlerdi turaqlı rawajlandırıw» joybarın ámelge asırıw ilajları haqqında» ǵı qararı tiykarında 90 orınlıq mámleketlik mektepke shekemgi bilimlendiriw mákemesi imaratı qurılısı menen tanıstıq. Balalar baqshası imaratı eki qabattan ibarat bolıp, «Nókis erkin qurılıs» JShJ tárepinen qurılmaqta.
-Awılımızda burın balalar baqshası joq edi. Mine balalar baqshası qurılıp atırǵanınan sheksiz quwanıshlımız. Qurılıs isleri jaqsı alıp barılıp atır. Bul ushın basshılarımızǵa, qurılısshılarımızǵa minnetdarmız,-deydi awıl turǵını A.Xojaniyazov.
Mámleketimiz boylap alıp barılıp atırǵan abadanlastırıw, kóklemzarlastırıw jumısları Taqıyatas rayonında da keń kólemde ámelge asırılmaqta. Biz «Naymankól» APJda jaylasqan «Ketmenshi» qoyımshılıǵı átirapında abadanlastırıw jumısların alıp barıp atırǵan máhálle turǵınlarınıń jumısları menen tanısqanımızda ol jerde kóp milletli xalqımızdıń milletler aralıq tatıwlıǵınıń gúwası boldıq. Jası úlkenler, kóshe biyleriniń basıshılıǵında alıp barılıp atırǵan bul ilajda jurnalistler miyweli daraqlar egiwge óz úlesin qosıp, olar menen sáwbetlesti.
Ilaj dawamında rayon hákimiyatında press konferenciya ótkerilip, onda qatnasqan rayon hákiminiń orınbaslarları ǵalaba xabar quralları wákilleriniń qızıqtırǵan sorawlarına juwap berdi. Aldaǵı waqıtlarda ǵalaba xabar quralları wákilleri menen birge islesiw maqsetinde jobalar rejelestirilip, kelesi ilajlarda iri óndiris orınları menen tanısıw máseleleri kelisip alındı.

G.Turdıshova, Qaraqalpaqstan xabar agentligi

M.Habibullaevtıń túsirgen súwretleri