Ózbekstan Respublikası Prezidenti Shavkat Mirziyoevtiń Franciya Respublikasına mámleketlik saparı aldında Parij qalasındaǵı «Intercontinental» miymanxanasında Ózbekstan – Franciya turizm forumı hám «Ózbekstan – Jipek jolınıń dúrdanası» prezentaciyası bolıp ótti.

Turizm komiteti tárepinen shólkemlestirilgen ilajda Franciya mámleketiniń turizm administraciyası, eki mámlekettiń isbilermenlik subyektleri, diplomatiyalıq korpus rásmiyleri, media wákilleri qatnastı.
Maqset – Ózbekstan hám Franciya arasında turizm tarawındaǵı baylanıslardı jańa basqıshqa alıp shıǵıw, isbilermenler arasında jedel baylanıslardı jolǵa qoyıw hám mámleketimizge turistler aǵımın arttırıw.
«Ózbekstan – Jipek jolınıń dúrdanası» prezentaciyasında miymanlarǵa mámleketimizdiń turizm tarawındaǵı perspektivaları hám turistlik infrastrukturanı rawajlandırıwǵa qaratılǵan háreketler, turistler ushın jáne de qolaylı sharayat jaratıw maqsetinde ámelge asırılıp atırǵan jańalıqlar haqqında prezentaciya ótkerildi.
«Uzbekistan Airways» aviakompaniyası tárepinen logistika imkaniyatı hám házirgi aviaqatnawlar haqqında maǵlıwmat tanıstırıldı. Sonday-aq, kompaniyanıń turizmdi rawajlandırıwdaǵı ornı hám Ózbekstanǵa keliwshi turistlerge joqarı sapalı xızmet kórsetiw ushın jańa imkaniyat hám baǵdarlar haqqında sóz boldı.
Eki mámleket biznes wákilleriniń qatnasıwında ótkerilgen «V2V» ushırasıwları sheńberinde isbilermenlik baylanısları ornatıldı, birge islesiw imkaniyatları dodalandı hám turistler aǵımın arttırıw boyınsha óz-ara kelisimlerge erisildi.
Bul sóylesiwler eki mámlekettiń turizm tarawı isbilermenlerine birge islesiwdi ornatıw hám jańa joybarlardı rawajlandırıw ushın jaqsı imkaniyat jaratadı.
Sonday-aq, Franciya turistlik kompaniyalarınıń wákilleri forum sheńberinde shólkemlestirilgen prezentaciya arqalı sońǵı jılları Ózbekstanda turizm tarawında ámelge asırılǵan reformalar nátiyjesinde aymaqlarda qurılǵan turizm dárgayları, jańalanǵan infrastruktura hám mádeniy miyras obyektleri menen tanıstı.
Ilajǵa kelgen miymanlar elimizdiń bay hám hár qıylı mádeniyatı hám dástúrlerin sáwlelendiriwshi milliy nama-qosıqlar hám ayaq-oyınlar menen jaqınnan tanısıp, ózbek aspazları tárepinen tayarlanǵan milliy taǵamlardan dám tattı.

B.Xudoyberdiev,
ÓzA