«Ózbekstan Respublikası Prezidentiniń ayırım qararlarına áskeriy xızmetkerlerdi sociallıq qorǵawdı kúsheytiwge qaratılǵan ózgerisler hám qosımshalar kirgiziw haqqında»ǵı Prezident qararı qabıl etildi.
Qararǵa bola, Prezidenttiń ayırım qararlarına tómendegilerdi názerde tutıwshı ózgerisler hám qosımshalar kirgizildi:
– 2025-jıl 1-marttan áskeriy xızmetkerlerge turaq jaydı ijaraǵa alǵanı ushın tólenetuǵın hár aylıq pul kompensaciyası muǵdarı 20 procentke arttırıladı;
– 2025-jıl 1-iyunnan ipoteka kreditlerin ajıratıw kórsetkishleri tiykarında turaq jay menen támiyinlenetuǵın, kalendar esabında 10 jıldan artıq áskeriy xızmetti ótegen áskeriy xızmetkerlerge turaq jay satıp alıw (qurıw) ushın ipoteka krediti alınıwında ajıratılatuǵın dáslepki tólem muǵdarı turaq jaydıń esaplanǵan bahasınıń 35 procenti muǵdarında belgilenedi.
2025-jıl 1-marttan jıldıń aqırına shekem Qurallı Kúshlerdiń kontrakt boyınsha xızmet etip atırǵan, ámeldegi qárejetler sheńberinde turaq jay menen támiyinlenbegen qatardaǵı ásker, serjant hám oficerler quramındaǵı áskeriy xızmetkerlerge turaq jaydı ijaraǵa alǵanı (ijarada turǵanı) ushın:
Tashkent qalasında – BEMniń 4,8 esesine shekemgi muǵdarda;
Nókis qalası hám wálayatlar oraylarında – BEMniń 3,6 esesine shekemgi muǵdarda;
basqa qalalar, rayon orayları hám elatlı punktlerde – BEMniń 2,4 esesine shekemgi muǵdarda hár aylıq pul kompensaciyası tólemleri belgilendi.
Shańaraq aǵzaları 3 adam hám onnan artıq bolǵan jaǵdayda áskeriy xızmetkerlerdiń usı pul kompensaciyası muǵdarları 50 procentke arttırıladı.
2026-jıldan hár jılı hár aydaǵı pul kompensaciyası tólemleriniń muǵdarı aymaqlar kesiminde turaq jay ijarasınıń bazar bahalarınan kelip shıqqan halda, Húkimet qararı menen belgilep barıladı.

ÓzA