Futbol boyınsha U-20 saylandı komandaları arasında ótkerilip atırǵan Aziya chempionatına qatnasıp atırǵan Farhod Nishanov basshılıǵındaǵı Ózbekstan saylandı komandası 3-turda Iran saylandı komandası menen oynap, qarsılaslarına 2:1 esabında jeńilip qaldı.

Ushırasıwdıń 52-minutında Yusef Marzaeh hám 66-minutında Ismail Golizoda tárepinen saylandı komandamız dárwazasına urılǵan gollarǵa, 80-minutta Muhammadali Wrinboev juwap qaytarıwǵa eristi.
Endi komandamız aǵzaları 23-fevral kúni mámleketimiz waqtı menen 16:30 da sherek final oyınları sheńberinde «D» toparınıń jetekshisi Qubla Koreya saylandı komandasına qarsı oyınǵa túsedi.

Adilbay Orazov,
Qaraqalpaqstan xabar agentligi sholıwshısı