23-fevral kúni Germaniyada parlamentlik saylaw bolıp ótedi. Usı múnásibet penen «Die Welt» gazetası siyasiy toparlardıń imkaniyatına anıqlıq kirgiziw maqsetinde sorawnama ótkerdi. Sorawnama juwmaqlarındaǵı maǵlıwmatlar isenimli shıqsa, Fridrix Merc GFRdıń jańa kancleri boladı. Onıń konservativ blogı bolsa absolyut kópshilik orındı qolǵa kirgize almaydı hám parlamentke kiretuǵın basqa da siyasiy kúshler menen koaliciya dúziwge tuwra keledi. Yaǵnıy Merc SDP yamasa «Jasıllar» menen kelisiwi múmkin.
Bunnan burın Ukrainaǵa áskeriy járdemdi dawam ettiriwge wáde bergen jetekshilikke dawager Kievke «Taurus» qanatlı raketasın jiberiwdiń tárepdarı. Ukraina birazdan berli Germaniyadan 500 kilometr aralıqqa ushatuǵın usınday qurılmalar jetkerip beriwdi sorap keledi. Sholc húkimeti kelispewshilik keskin kúsheyip ketiwinen qáweterlenip, bul háreketten tıyılıp kelmekte.

Qaraqalpaqstan xabar agentligi