Кеча тунда футбол бўйича Европа чемпионлар лигаси 7-туридан ўрин олган навбатдаги учрашувлар ўтказилди. Баҳсларда кутилмаган натижалар ҳам қайд этилди.

Ушбу турда “Бавария” сафарда “Фейеноорд” билан рақобатлашди. Ушбу учрашувнинг 21-дақиқасида мезбонлар шарафини ҳимоя қилаётган Хименес гол уриб, ҳисобни очган бўлса, 45+9-дақиқада ўзи пенальтини муваффақиятли якунлади. Учрашувнинг 89-дақиқасида Уэда меҳмонлар дарвозасини аниқ нишонга олди ва ўйинга нуқта қўйди. “Фейеноорд” – “Бавария” 3:0. Дарвоқе, мазкур учрашувда “Фейеноорд” посбони Жастин Бейло ажойиб сейвларни амалга оширди.

Шунингдек, бу тун Италия жамоалари учун ҳам омадли бўлди. Аниқроқ айтадиган бўлсак, “Милан” ўз майдонида “Жирона” устидан 1:0 ҳисобида зафар қучди. Учрашувдаги ягона голга Леау муаллифлик қилди. “Интер” эса сафарда “Спарта Прага”ни Мартинеснинг ягона голи эвазига мағлуб этди.

Мадрид шаҳрининг “Реал” жамоаси бу турда “Зальцбург”ни меҳмон қилди. “Қироллик клуби” рақиб дарвозасига 5 та гол уриб, битта гол ўтказиб юборди. Учрашув давомида “Реал” сафида Винисиус ва Родриго дубль қайд этган бўлса, Мбаппе битта голга муаллифлик қилди. Меҳмонларнинг ягона голини 85-дақиқада Мадс киритди.

“Арсенал” эса бу турда “Динамо Загреб”ни 3:0 ҳисобида таслим қилди. Лондонда ўтказилган баҳснинг иккинчи дақиқасидаёқ Райс ҳисобни очди, 66-дақиқада Ҳаверц, 90-дақиқада эса Эдегор гол урди. “ПСЖ” эса ўз майдонида “Манчестер Сити”ни 4:2 ҳисобида таслим этди. “МС” учрашувнинг 50- ва 53-дақиқаларида Грилиш ва Ҳоланд томонидан киритилган голлар эвазига олдинда бораётган эди. Бироқ парижликлар камбэк амалга ошириб, Дембеле, Барколья, Невеш ва Рамушнинг голлари эвазига ғалабани илиб кетди.

Шунингдек, 7-турда “РБ Лейпциг” – “Спортинг” 2:1, “Шахтёр Донецк” – “Брест” 2:0, “Селтик” – “Янг Бойз” 1:0 натижалари қайд этилди.

Европа чемпионлар лигасининг 7-тур учрашувларидан сўнг “Ливерпуль” 21 очко билан ҳамон етакчи бўлиб турган бўлса, “Барселона” 18 очко жамғариб, иккинчи ўринда бормоқда. Бу жамоалар муддатидан аввал плей-оффга йўл олди. Жадвалнинг учинчи поғонасида “Арсенал” 16 очко билан бормоқда. Бироқ, 4-ўринни эгаллаб турган “Интер”да ҳам 16 очко мавжуд. “Атлетико Мадрид” ва “Милан” клублари 15, “Аталанта” 14 ва “Байер” 13 очко тўплаган ҳолда кучли 8 таликни якунлаб берди.

“Астон Вилла”, “Монако”, “Фейеноорд”, “Лилль”, “Брест” жамоалари бир хил – 13 очко жамғариб, 9-13 ўринларга голлар нисбати бўйича тақсимланган бўлса, “Боруссия Д”, “Бавария”, “Реал”, “Ювентус” ҳамда “Селтик” клублари бир хил 12 очко билан кейинги поғоналардан жой олган.

7-турдан сўнг 11 очкони қўлга киритган “ПСВ” ва “Брюгге” жамоалари 19-20, “Бенфика”, “ПСЖ”, “Спортинг” “Штутгарт” клублари 10 очко билан 21-24-ўринларни банд этди. “Манчестер Сити” ва “Динамо Загреб” ҳисобида 8 очко мавжуд бўлиб, улар 25-26, “Шахтёр Донецк” эса 7 очко билан 27-ўринда қолмоқда. “Болонья” 5 ва “Спарта Прага” 4 очко билан кейинги ўринларда қайд этилган. “РБ Лейпциг”, “Жирона”, “Црвана Звезда”, “Штурм”, “Зальцбург” каби жамоалар 3 очко билан 30-34-ўринларда одимламоқда. Етти тур давомида барча рақибларига уч очкодан улашаётган “Слован Б”ва “Янг Бойз” клублари охирги ўринларни банд этган.

Маълумот ўрнида: ЕЧЛнинг янги форматига кўра, умумий босқичда 36 та жамоа иштирок этади. Улардан энг кучли саккизта жамоа нимчорак финалга тўғридан-тўғри йўлланма олади. 9-24 ўринларни эгаллаган иштирокчилар плей-офф ўйинида иштирок этади. Энг кам очко тўплаган 12 та жамоа мусобақадаги иштирокини тўхтатади.

Европа чемпионлар лигасининг умумий гуруҳдаги сўнгги 8-тур баҳслари 30 январь куни бўлиб ўтади.

Жавоҳир Тошхўжаев,  

ЎзА