Házirgi kúnleri dúnya shaxmat jankúyerleriniń dıqqatı Niderlandiyanıń Veyk-an-Zee qalasında ótkeriletuǵın «Tata Steel Chess-2025» jarısına qaratılǵan desek asıra aytqan bolmaymız. Dúnyanıń eń kúshli shaxmatshıları qatnasıp atırǵan bul turnirdiń «Masters» toparında Nodirbek Abdusattorov, «Chellenjer»inde bolsa, Nodirbek Yakubboev sıylı orınlar ushın gúres alıp barmaqta.

Keshe ótkerilgen tórtinshi tur bellesiwlerinde Abdusattorov Aziya chempionı, usı jarıstıń ámeldegi jeńimpazı qıtaylı Vey I menen teńbe-teń oynadı.
Birinshi turda Abdusattorov penen teńbe-teń oynaǵannan keyin izbe-iz 3 turda jeńiske erisken hindstanlı Rameshbabu Pragnanandha 3,5 upay menen turnirde jeke kárwanbası bolıp aldı.
Al, Nodirbek Abdusattorov bolsa, 3 upay toplap, 2-orındı iyelep tur.
Tilekke qarsı, «Chellenjer» toparında qatnasıp atırǵan Nodirbek Yakubboev 4-turda da jeńiliske ushıradı.
Tórtinshi turdan soń Yakubboev 1,5 upay menen 10-orındı iyelep kelmekte.

Adilbay Orazov,
Qaraqalpaqstan xabar agentligi sholıwshısı