Қатарда ФИФА Қитъалараро кубогининг финал баҳсида Испаниянинг «Реал Мадрид» ва Мексиканинг «Пачука» жамоалари ўзаро рақобатлашди.

“Лусайл” стадионида «Реал Мадрид»  устунлигида ўтган ўйинда Килиан Мбаппе 37, Родриго 53 ва Винисиус Жуниор 84-дақиқаларда гол уриб, жамоасининг йирик, 3:0 ҳисобидаги ғалабасини таъминлади.

Шу тариқа қироллик клуби ФИФА Қитъалараро кубогини қўлга киритди. Шуни таъкидлаб ўтиш лозимки, Карло Анчелотти шогирдлари учун бу соврин 2024 йилдаги бешинчиси бўлди. Улар бундан олдин Испания Суперкубоги, Ла Лига, ЕЧЛ ва Европа Cуперкубогида ғолиб бўлган эди.

Шунингдек, Карло Анчелотти «Реал Мадрид» тарихидаги энг кўп соврин ютган мураббийга айланди. Аниқроқ айтадиган бўлсак, италиялик мутахассис мадридликлар билан жами 15 та совринни қўлга киритган. Бунга қадар энг яхши натижа Мигель Муньосга тегишли эди. У «Реал» билан 14 та соврин ютган.

Дарвоқе, К.Анчелотти ҳисобида умумий олганда жами 31 та соврин бор.

Жавоҳир Тошхўжаев,

ЎзА