Ички ишлар вазири Пўлат Бобожонов Ўзбекистон Республикаси Президентининг ҳуқуқни муҳофаза қилувчи ва назорат органлари фаолиятини мувофиқлаштириш масалалари бўйича маслаҳатчиси Дониёр Қодиров иштирокида йиғилиш ўтказди.

Йиғилишда давлатимиз раҳбари раислигида 12 январь куни Хавфсизлик кенгашининг Қуролли Кучлар ва ҳарбий-маъмурий секторларнинг 2023 йилдаги фаолияти якунлари ва яқин истиқболга мўлжалланган вазифалар муҳокамасига бағишланган кенгайтирилган мажлисида белгиланган вазифалар ва қўйилган топшириқларнинг ижросига қаратилган масалалар кўриб чиқилди.

Тадбир давомида Ўзбекистон Республикаси Президентининг қарори билан Ашрапов Рамазон Ахматхўжаевич Ички ишлар вазирининг ўринбосари – Тергов департаменти бошлиғи лавозимига тайинлангани эълон қилинди.

Мажлисда тергов ва эксперт-криминалистика соҳасига оид фаолиятни танқидий кўриб чиқиш, терговчи ва экспертларнинг малакасини ошириш зарурлигига эътибор қаратилди.

Янги тузилган Криминология тадқиқот институти билан ҳамкорликда тизимни инновацион ва илмий ёндашувлар асосида янада такомиллаштириш, ахборот алмашинуви ва қарорлар қабул қилиш бўйича замонавий ҳуқуқий ва илмий ишланмаларни амалга кенг жорий этиш, соҳада ахборот хавфсизлиги ва киберхавфсизликни таъминлаш бўйича тегишли топшириқлар берилди.

Шунингдек, тадбирда республикамиз ҳудудида ўтган йилнинг ҳисобот даврида жиноятчиликка қарши кураш масалалари, жамоат хавфсизлиги концепциясида белгиланган вазифаларнинг ижроси, ҳуқуқбузарликларнинг барвақт олдини олиш, хизмат интизоми ва қонунийликка риоя этилиши ҳамда соҳага оид бошқа йўналишларда амалга оширилган ишлар танқидий муҳокама этилди.

Тадбирда кўтарилган муаммолар ва ечимини кутаётган масалалар бўйича соҳа масъулларининг таклиф ва мулоҳазалари тингланди. Кўрсатилган камчиликларни бартараф этиш ҳамда келгусида амалга оширилиши лозим бўлган ишлар юзасидан аниқ вазифалар белгилаб олинди.

Н.Абдураимова, ЎзА