Россия ташқи ишлар вазири Сергей Лавров АҚШга мурожаат йўллаб, Владимир Путин ва Дональд Трамп ўртасидаги саммитга тайёргарликни қайта тиклаш таклифини билдирди. Бу ҳақда мулозим РФ оммавий ахборот воситалари орқали маълум қилди.

Октябрь ойи охирида Будапештда уюштирилиши мўлжалланган мазкур учрашув Кремль Украинага қарши ҳарбий ҳаракатни тўхтатмагани сабабли амалга ошмай қолган. Урушни тугатишга қатъий бел боғлаган Трамп Россия қўйган талабдан ҳафсаласи пир бўлиб, самарасиз мулоқотдан шу тариқа воз кечди. Шундай вазиятда Лавров кутилмаган фикр билан чиқди:

– Москвада америкалик ҳамкасблар билан саммитга тайёргарлик жараёнини қайта бошлаш масаласини муҳокама қилишга тайёрмиз!

Унинг сўзларига кўра, “Агар АҚШ вакилалари ҳам ўз таклифини янгиласа, учрашув учун Будапешт афзал жой бўлиб қолаверади. Афсуски, тажрибали сиёсатчи “таклифни янгилаш” деганда нимани назарда тутганига изоҳ бермаган.

Маълумки, Лавров АҚШ давлат котиби Марко Рубио билан охирги марта 20 октябрда суҳбатлашган. Ўшанда дипломатлар телефон орқали Будапешт саммитига ҳозирлик мавзусини кўтарган. Шундан сўнг АҚШ давлат котиби Трампга учрашувни бекор қилиш тавсиясини берган ва бунинг ортидан РФга қарши кенг миқёсли санкция жорий этилди.

Россия ташқи сиёсат идораси раҳбари фикрича, “ўшанда саммит нима учун бекор қилингани ҳамон тушунарсиз”. Қизиқ, Лавровнинг “тушунмаслиги” дипломатик ўйинми ёки соддалик?

Кенжа Бекжонов, Анвархўжа Аҳмедов, ЎзА