Глобал инновация индексининг 2025 йилги рейтингида Ўзбекистон 139 та мамлакат орасида 79-ўринни эгаллади. “Innoweek–2025” ҳафталиги доирасида “Глобал инновация индекси-2025: Миллий тақдимот” мавзусида ўтказилган конференцияда мамлакатимиз эришган натижалар таҳлил қилинди.

Рейтингнинг таркибий индикаторлари Ўзбекистон Республикаси учун устувор бўлган халқаро рейтинг ва индекслар билан узвий боғлиқлиги, ушбу индикаторлар баҳосини яхшилашнинг бошқа халқаро рейтингларга кўрсатадиган ижобий таъсири ҳамда мамлакатимизни 2030 йилга келиб, ТОП-50 та давлат қаторига киришини таъминлаш бўйича муҳокамалар ўтказилди.

Тадбирда Бутунжаҳон интеллектуал мулк ташкилоти Иқтисодиёт ва статистика департаменти бошлиғи Саша Вунш-Винцент иштирок этди ҳамда “Ўзбекистоннинг 2025 йилги Глобал инновация индекси рейтингида эришган натижалар” мавзусида маъруза қилди. Мутахассис ўз чиқиши давомида олдинда турган вазифалар юзасидан фикр билдирди ва аниқ таклифларни ўртага ташлади.

Ўзбекистон рейтингга илк бор 2015 йилда қўшилган бўлиб, 141 та мамлакат орасида 122-ўринни эгаллаган. Мамлакатимиз 2020 йилда 93-ўрин, 2021 йилда 86-ўрин, 2022 йилда 82-ўрин, 2023 йилда 82-ўрин ва 2024 йилда 132 та мамлакат орасида 83-ўриндан жой олган. Бундан кўриниб турибдики, илм-фан ва инновациялар соҳасида амалга оширилаётган чора-тадбирлар йилдан-йилга ўз самарасини кўрсатмоқда.

Дилдора ДЎСМАТОВА

ЎзА