Грециянинг Афина шаҳрида ўтказилган спорт курашлари бўйича U17 ёш тоифасидаги жаҳон чемпионати ўз якунига етди. Унда Ўзбекистон терма жамоаси жами 5 та олтин, 3 та кумуш ва 1 та бронза медалига эга бўлди.

Жумладан, мусобақанинг эркин кураш беллашувларида Абдумалик Жалолиддинов ва Улуғбек Рашидов кумуш, Миржалол Мукаммилов эса бронза медалини қўлга киритди.

Юнон-рум кураши бўйича ўтган беллашувларда Бунёд Ҳасанов, Абдулазиз Холмирзаев, Отабек Турсунов ва Беҳрузбек Валиев каби полвонларимиз жаҳон чемпионига айланди. Уларнинг қайд этган натижалари терма жамоамизнинг умумжамоа ҳисобида иккинчи ўриндан жой олишига сабаб бўлди.

Шуни таъкидлаб ўтишимиз лозимки, мазкур чемпионатнинг аёллар курашида -40 килограммгача вазн тоифасидаги баҳсларда иштирок этган спортчимиз Шоҳиста Шоназарова барча рақиибларини доғда қолдирган ҳолда мамлакатимизда мазкур ёш тоифасида жаҳон чемпиони бўлган илк қизга айланди. Шунингдек, Муҳайё Раҳимжонова кумуш медаль билан тақдирланди.

Жавоҳир Тошхўжаев,

ЎзА