Яқинда АҚШ томонидан Украинага кўрсатилаётган кўмак тўхтатилгани ҳақида хабарлар тарқалганди. Шунингдек, разведка маълумоти ҳам берилмай қўйганди. Кеча Саудия Арабистони Жидда шаҳрида Киев билан музокара якунида Қўшма Штатлар ёрдам беришдаги танаффусни бекор қилди. Бу ҳақда  Президент Дональд Трампнинг миллий хавфсизлик бўйича маслаҳатчиси Майкл Уолтц баёнот берди. Мулоқотда Америка томонидан давлат котиби Марко Рубио, Украинадан ташқи ишлар вазири Андрей Сибига, Владимир Зеленский идораси раҳбари Андрей Ермак ва мудофаа вазири Рустем Умеров ҳам иштирок этган.

Давлат департаменти расмий вакили Тэмми Брюс АҚШ учрашувдан қониқиш ҳосил қилганини билдирган.

Америка томони таъкидлашича, Трамп ўт очиш тўхтатилишини истайди, бунга Киев ҳам тайёр. Энди Вашингтон Москвадан жавоб кутяпти. Шунингдек, Украина делегацияси можарони тўхтатиш учун аниқ қадам ва таклифлар тақдим этган. Уолтц яқин кунларда Россия вакиллари билан гаплашмоқчилигини айтган.

Қўшма Штатлар фикрича, Украинадаги можаронинг ҳарбий ечими йўқ, урушга фақат музокара ёрдамида барҳам бериш мумкин. Шу боис Оқ уй Россия ўт очишни тўхтатиш таклифини қабул қилишига умид билдирди. Шунингдек, учрашувда асирларни алмашиш, гуманитар вазиятни ўнглаш ҳам жараённинг бир қисми бўлиши кераклигига урғу берилди.

АҚШ зудлик билан ўт очишни 30 кунга тўхтатиш режимига чақиради, келишув томонлар розилиги билан узайтирилиши мумкин.

Оқ уй баёнотида қайд этилишича, Америка ва Украина етакчилари ўз ҳукуматларига ер ости нодир металлари бўйича келишувни имзолаш босқичига етказиш юзасидан кўрсатма беради. Келишув муҳим аҳамиятга эгалиги, бироқ энг асосийси Украинада тинчликка эришиш экани Киевга тушунтирилган.

Трамп АҚШ ва Россия вакиллари “бугун ёки эртага” учрашиши, шу ҳафта Россия раҳбари билан суҳбат ҳам режалаштирилганини эълон қилди.

– Агар биз Россияни ишонтира олсак, ажойиб, – деди Трамп Оқ уй ҳудудида журналистларга. – Акс ҳолда, уруш давом этади ва одамлар эртага ва кейинги кунлари ҳам қурбон бўлаверади.

Жидда шаҳрида АҚШ ва Украина делегациялари учрашуви натижасини Европа Иттифоқи ҳамда қиъанинг Германия, Франция, Буюк Британия каби етакчи давлатлари ва тузилмалари ҳам ижобий баҳоламоқда. Мазкур учрашув Украинада тинчлик ўрнатишга қаратилган муҳим қадам бўлгани таъкидланмоқда.

С.Раҳимов, ЎзА