Нидерландиянинг Вейк-ан-Зее шаҳрида шахмат бўйича 13 та турдан иборат “Tata Steel Chess-2025” турнирининг ғолиб ва совриндорлари аниқланди.

Ўн етти кун давомида кечган шиддатли “ақл жанглари” дунё шахмат ишқибозларига бир олам завқ бағишлади.

“Мастерс” гуруҳида ғолибликка асосий даъвогар Гукеш Доммаражу 13-турда оқ доналарда ҳаракатланишига қарамасдан Аржун Эригаисига ютқазиб қўйди. Худди шунингдек, ҳамюрти Рамешбабу Праггнанандха қора доналарда Винсент Кеймерга қаршилик кўрсатди. 7 соатга яқин вақт давом этган баҳсда германиялик шахматчи Праггнанандхани 80-юриш ҳолатида таслим этди.

Айни натижа Гукеш ва Праггнанандхадан бирини чемпионлик даъвосидан маҳрум этиши мумкин эдики, бунинг учун ҳамюртимиз Нодирбек Абдусатторов сўнгги 13-турда ҳиндистонлик Пентала Харикришнани мағлуб этиши лозим эди.

Бироқ, биз кутган натижа қайд этилмади. Абдусатторов оқ доналарда ҳаракатланишига қарамай ҳинд шахматчиси билан учрашуви дуранг ҳолатида якунланди. Ўйиннинг 38-юриш вазиятида туб бурилиш Нодирбекка мағлубиятга тенг муроса йўлини келтириб чиқарди.

Оқибатда ғолиблик учун тай-брекда Гукеш Доммаражу – Рамешбабу Праггнанандха рўбарў келди. 3 партиядан иборат тай-брекда аввалига амалдаги жаҳон чемпиони устунликка эришди. Лекин кейинги 2 та партияда Праггнанандханинг омади кулиб боқди.

Шу тарзда “Tata Steel Chess-2025”нинг бу йилги ғолиблиги Рамешбабу Праггнанандхага, 2-ўрин Гукеш Доммаражуга, 3-ўрин Нодирбек Абдусатторовга насиб этди.

13-турнинг қолган учрашувлари: Аниш Гири – Йорден ван Форест-0,5:0,5, Владимир Федосеев – Вэй И-0,5:0,5, Фабиано Каруана – Макс Вармердам-0:1, Алексей Сарана – Леон Люк Мендонка-0,5:0,5 кўринишида якунланди.

“Tata Steel Chess-2025” турнирининг бош директори Питер Леко ўтказилган ўйинлар, шахматчиларнинг натижаси тўғрисида сўз юритди. Нодирбек Абдусатторовнинг уч йилдан бери дунёнинг энг етакчи шахматчиларидан бири сифатида турнирга ўзгача шукуҳ бағишлаётганини таъкидлади.

“Челленжер“ гуруҳида дона сурган ҳамюртимиз Нодирбек Ёқуббоев 12-турда бўлгани сингари ғалабага эришди. 13 турда қора доналарда ҳаракатланган Ёқуббоев хитойлик Лу Мяони таслим қилди ва мусобақани 8 очко билан қўшимча кўрсаткичлар ҳисобига 4-ўринда якунлади.

Ушбу гуруҳда чехиялик Тай Дай Ван Нгуен 13 имкониятдан 9.5 очко жамғариб, ғолибликни тантана қилган бўлса, кейинги ўринларни озарбайжонлик Айдин Сулейманли, нидерландиялик Эрвин Л’Ами қўлга киритди.

Т.Рўзиев,

ЎзА