Сўнгги кунларда Ўзбекистон миллий терма жамоаси ва Франциянинг “Ланс” клуби аъзоси Абдуқодир Ҳусанов қишки трансферлар даврида ўзининг янги жамоасига ўтиши кутилаётгани ҳақида хабарлар кўпаймоқда.
“Ланс” клуби Абдуқодирга даъвогарлар кўплигидан фойдаланган ҳолда ушбу ўйинчига қай бир жамоа кўп пул таклиф қилса, ўша жамоа билан келишувни амалга оширишни ўз олдига мақсад қилиб қўйгани барчага маълум.
Шу боис ҳам “Ланс” жамоаси мутасаддилари футболчимизнинг трансфери билан шуғулланишни машҳур агент Жорже Мендешга ишониб топширди. Ҳозирда португалиялик мутахассис “ПСЖ”, “Манчестер Сити” ва “Реал” каби гранд клублар билан трансфер борасида дастлабки музокараларни ўтказиб бўлди.
Навбатда “Байер Леверкузен”, “Наполи”, “Ювентус”, “Боруссия Дортмунд”, “Ньюкасл”, “Тоттенхэм” каби клублар бор. Гарчи бу жамоалар ҳали аниқ таклиф билан чиқмаган бўлсада, ёш истеъдодли ўзбек ўғлонини ўз сафларига қўшиб олишга қизиқмоқда.
Бироқ, барча жамоалар орасида “Манчестер Сити” ва “Реал” клублари айнан А.Ҳусановдек ҳимоячига катта эҳтиёж сезмоқда. Ҳар икки клуб таркибдаги муаммоли вазиятдан келиб чиқиб, жамоада узоқ муддат ўйнаши мумкин бўлган марказий ҳимоячига муҳтож.
Аниқроқ айтадиган бўлсак, “МС” устози Хосеп Гвардиола жароҳат туфайли Жон Стоунз ва Рубен Диаш каби марказий ҳимоячиларидан фойдалана олмаяпти. Натан Аке ва Мануэль Аканжи эса бир маромда ўйнай олмаётгани турли муаммоларни келтирмоқда.
Карло Анчелотти қўл остидаги “Реал” клубининг тажрибали ҳимоячиси Эдер Милитаонинг оғир жароҳати сабаб, мадридликлар таркибида айнан марказий ҳимоячига талаб ортган. Тўғри, Европанинг кучли бешлик чемпионатларида тажрибали ҳимоячилар бор, бироқ уларнинг трансфер нархлари баланд экани боис, “МС” ва “Реал” учун 25-30 миллион евро эвазига улардан қолишмайдиган Абдуқодир Ҳусановни сотиб олиш мақбул ечимдир.
Нима бўлганда ҳам қишки трансферлар ойнасида Абдуқодир Ҳусанов катта эҳтимол билан Европанинг топ клубларидан бириги ўтиши шубҳасиз. Бироқ, ёш футболчимиз номдор жамоа таркибига ўтиб, захирада қолгандан кўра, Европанинг ўртамиёна жамоаларида мунтазам ўйин амалиётига эга бўлиши биз учун ўта муҳим.
Айниқса, Абдуқодирнинг терма жамоамиз сафида жаҳон чемпионатига чиқиш йўлидаги баҳсларда ҳимоя чизиғини қўриқлаши биз учун аҳамиятли.
Жавоҳир Тошхўжаев, ЎзА