Нукусда Қорақалпоғистон Республикаси Жўқорғи Кенгесининг биринчи сессияси бўлиб ўтди.
Сессияда вазирликлар, идора ва корхоналарнинг, ҳуқуқни муҳофаза қилиш органлари раҳбарлари ва оммавий ахборот воситалари вакиллари иштирок этди.
Дастлаб Қорақалпоғистон Республикаси Марказий сайлов комиссияси раисининг ахборот тингланди.
Сессияда Қорақалпоғистон Республикаси Жўқорғи Кенгеси Раисини сайлаш тўғрисидаги масала кўриб чиқилди. “Қорақалпоғистон Республикаси Жўқорғи Кенгесининг регламенти тўғрисида”ги Қонунига мувофиқ сиёсий партиялар фракцияларининг Оқсоқоллар кенгаши тузилиб, унинг таркиби тасдиқланди.
Оқсоқоллар кенгашининг мажлиси ўтказилиб, унда Қорақалпоғистон Республикаси Жўқорғи Кенгеси Раиси лавозимига 57-сонли “Бердақ” сайлов округидан депутат Оринбаев Аманбай Тлеубаевичнинг номзоди тақдим этилди.
Ўзбекистон Республикаси Президентининг келишуви билан сессияда яширин овоз бериш йўли билан депутат Оринбаев Аманбай Тлеубаевич Қорақалпоғистон Республикаси Жўқорғи Кенгеси Раиси этиб сайланди.
Сессияда фракциялар аъзолари сўзга чиқиб, Президентимиз томонидан Қорақалпоғистон Республикасида амалга оширилаётган кенг кўламли ишларда А.Оринбаевнинг ўрни салмоқли эканлиги алоҳида таъкидланди.
Шундан сўнг, “Қорақалпоғистон Республикаси Вазирлар Кенгаши Раиси тўғрисида”ги масала кўриб чиқилди ҳамда Ўзбекистон Республикаси Президентининг келишуви билан Эрманов Фарҳод Уразбаевич Қорақалпоғистон Республикаси Вазирлар Кенгашининг Раиси этиб тайинланди.
Сессияда “Қорақалпоғистон Республикаси Жўқорғи Кенгеси Раисининг ўринбосарини сайлаш тўғрисида”ги масала кўриб чиқилди. 47-сонли “Саноат” сайлов округидан депутат Сапарбаев Рустам Турсинбаевич яширин овоз бериш йўли билан Қорақалпоғистон Республикаси Жўқорғи Кенгеси Раисининг ўринбосари этиб сайланди. Бу борада тегишли қарор қабул қилинди.
Шунингдек, сессияда Қорақалпоғистон Республикаси Жўқорғи Кенгеси қўмиталарининг таркиби ва раисларини сайлаш тўғрисидаги масалалар кўриб чиқилди.
Сессия ишида Ўзбекистон Республикаси Бош вазири А.Арипов, Ўзбекистон Республикаси Президентининг маслаҳатчиси Т.Худойбергенов иштирок этди ва нутқ сўзлади.
Довуд Абибуллаев, Мақсад Ҳабибуллаев (сурат),
ЎзА