Қозоғистоннинг Олмаота шаҳрида стол тенниси бўйича қизлар ўртасида “Олтин куз” анъанавий республика очиқ турнири ўтказилди.
Қувонарлиси, ушбу мусобақада 2012-2013 йилларда туғилган стол теннисчилар ўртасида Маҳлиё Машарипова, 2014 йил ва ундан кичик ёш тоифаларида Адия Тошмаҳаматова бронза медалини қўлга киритди.
Шуни таъкидлаб ўтишимиз лозимки, сўнгги йилларда мамлакатимизда ёшлар ўртасида стол теннисини янада оммалаштириш борасида олиб борилаётган самарали ишлар натижасида турли халқаро турнирларда спортчиларимиз иштирок этиб, муваффақият қозонмоқда.
Бунга мисол қилиб, бир неча кун олдин БААнинг Дубай шаҳрида “Youth Contender” турнирида қўлга киритилган натижани мисол қилиш мумкин. Ушбу мусобақада ёш стол теннисчиларимиз Хусен Искандаров олтин, Маҳлиё Машарипова кумуш ва Асель Еркебаева бронза медалига сазовор бўлди.
Жавоҳир Тошхўжаев, ЎзА