Президентимизнинг “Опера ва балет санъатини янада ривожлантириш чора-тадбирлари тўғрисида”ги қарорига асосан миллий опера ва балет санъатини жаҳон миқёсида кенг тарғиб этиш, илғор хорижий тажрибаларни ўрганиш ҳамда маданий алоқаларни янада кенгайтириш мақсадида Алишер Навоий номидаги Ўзбекистон давлат академик катта театри жамоаси бир қатор хорижий давлатларга ижодий сафарлар билан чиқмоқда.
Шу кунларда театр жамоаси Туркияда ижодий гастролда бўлиб турибди. Истанбул ва Бурса шаҳарларида машҳур композитор, пианиночи ва дирижёр Игорь Стравинскийнинг “Муқаддас баҳор” балети намойиш этилади. Шу билан бирга катта театрнинг етакчи опера ва балет солистлари иштирокида ўзбек композиторлар ва жаҳонга машҳур бўлган композиторларнинг асарлари ҳавола этилади .
Алишер Навоий номидаги Ўзбекистон давлат академик катта театри 2022 — 2026 йилларга мўлжалланган режага биноан 2022 йилдан буён хорижий гастрол сафарларини ташкил этиб келмоқда.
Жумладан, 2022 йилда Корея Республикасининг Тегу, Пусан, Кочанг, Пхёнтхек шаҳарлари бўйлаб ҳамда Озарбайжон Республикаси Боку шаҳрида, шунингдек, 2023 йилда Хитой, Россия, Қозоғистон, Беларусь Республикаси ҳамда 2024 йилнинг 13-14 март кунлари Қирғизистонда хорижий гастрол сафарлари амалга оширилди.
2024 йилда Қирғизистон, Туркия ва Италияга хорижий гастрол сафарлари режалаштирилган бўлиб, айни кунларда иккинчи хорижий гастрол сафари Туркияда бўлиб ўтмоқда. Унда Алишер Навоий номидаги Ўзбекистон давлат академик катта театрининг 130 нафарга яқин ходимлари иштирок этмоқда.
Шунингдек, жорий йилнинг Туркиянинг 16 та ҳудудида бўлиб ўтаётган “Türkiye Kültür Yolu Festivali” Халқаро санъат фестивали доирасида Алишер Навоий номидаги Ўзбекистон давлат академик катта театри ҳам меҳмон жамоа сифатида иштирок этади.
Дунёнинг барча нуқталаридаги маданият ва санъат соҳаси вакилларини бир нуқтада бирлаштирган ушбу санъат фестивалида дунёнинг машҳур маданият ва санъат намояндалари қатнашмоқда. Бу каби нуфузли фестивалда иштирок этишдан мақсад ўзбек санъатини ва маданиятини намойиш этишдан иборат.
– Театримиз “Türkiye Kültür Yolu Festivali” Халқаро санъат фестивалида меҳмон сифатида қатнашмоқда, – деди Ўзбекистон халқ артисти, Алишер Навоий номидаги Ўзбекистон давлат академик катта театри директори Рамиз Усмонов. – Мазкур фестивалда иштирок этиш учун аризалар икки йил олдиндан топширилиб, бир ярим йил аввал фестиваль дастури тасдиқланади. Шунга қарамай, биз икки ой аввал театримизнинг гастроль сафари доирасидаги намойишларини фестиваль дастурига киритишга эришдик. Яна бир қувончли жиҳати, жаҳонга машҳур бўлган театрлардан – Россия халқ артисти Валерий Гергиев бошчилигидаги Мариинск театри, Германиянинг “Deuche Opera Berlin” театри, Англиянинг “Royal Opera Hous” театрлари қаторида айнан бизнинг театримиз қатнашаётгани Ўзбекистон санъати учун жуда катта фахрдир. Ташриф давомида 2025 йилда Туркияда бўладиган жаҳонга машҳур Халқаро Аспендос опера ва балет фестивалига иштирок этиш бўйича ҳам келишувларга эришилди.
Н.Усмонова, ЎзА