АОКАда ўтказилган брифингда Қурилиш ва уй-жой коммунал хўжалиги вазирлиги ахборот хизмати раҳбари Саидносир Усмоновнинг қайд этишича, эндиликда рўйхатдан ўтказмасдан ўзбошимчалик билан қурилган объектлар фойдаланишга қабул қилинмайди.

Вазирлар Маҳкамасининг 2022 йил 20 апрелдаги қарори билан қурилиш соҳасига оид маъмурий Регламентлар тасдиқланган. Мазкур Регламентларда қурилиш ишларини амалга оширишда жисмоний ва юридик шахслар архитектура-режалаштириш топшириғини ишлаб чиқиш, лойиҳа-смета ҳужжатларини келишиш ҳамда қурилиш-монтаж ишларини бошлаши учун объектни рўйхатдан ўтказишлари шартлиги кўрсатиб ўтилган.

Бироқ айрим ҳолатларда шаҳарсозлик субъектлари яъни мулкдорларнинг мазкур регламент талабларини бажармаслиги, ўзбошимчалик билан қурилишлар қилаётган ҳолатлари ҳам учраб турибди.

Шу каби масалаларни ҳал этиш, қонуности ҳужжатларидаги бўшлиқларни тўлдириш мақсадида Вазирлар Маҳкамасининг 2023 йил 23 ноябрдаги “Шаҳарсозлик фаолиятида рухсат бериш тартиб-таомилларини такомиллаштиришга қаратилган Ўзбекистон Республикаси ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида”ги қарори қабул қилинди.

Мазкур ҳужжатнинг иккинчи бандида Қурилиш ва уй-жой коммунал хўжалиги соҳасида назорат қилиш инспекциясига 2024 йилнинг 1 апрелдан ҳудудий инспекцияларда рўйхатдан ўтмасдан қурилган объектларни инструментал техник текширувдан ўтказиб, фойдаланишга рухсат бериш ишларини тўхтатиш вазифаси юклатилган.

– 2024 йилнинг 1 апрелидан эътиборан ҳудудий Инспекциялардан рўйхатдан ўтказмасдан ўзбошимчалик билан қурилган ёки қурилаётган объектларни фойдаланишга қабул қилишга рухсатнома берилмайди, – деди Саидносир Усмонов. – Қурилиш ишларини амалга ошириш учун лойиҳа ҳужжатларини келишишдан бошлаб фойдаланишга қабул қилишгача бўлган барча жараёнлар рақамлаштирилган.  Яъни, ушбу жараёнларга оид барча ҳужжатлар электрон форматда онлайн қабул қилинади ва кўриб чиқилади. Шунингдек, объектларнинг қурилиш-монтаж ишларини назорат қилиш ҳудудий Инспекциялар томонидан махсус электрон платформа орқали амалга оширилади.

Шаҳноза Маматуропова,  

ЎзА