Португалиянинг Алмада шаҳрида дзюдо бўйича уч кун давом этган Гран-при мусобақасида мамлакатимиз спортчилари 2 та олтин медални қўлга киритди.
Дунёнинг 81 давлатидан 550 нафарга яқин маҳоратли дзюдочилар иштирок этган баҳсларда терма жамоамиз аъзоларидан Муҳриддин Тиловов 66 килограмм вазнда, Обидхон Номонов 73 кило оғирликда барча рақибларини мағлуб этиб, олтин медалларга мушарраф бўлиш билан бирга, келгуси йили Парижда ўтадиган Олимпиада ўйинлари учун 700 очко жамғаришга муваффақ бўлди.
Ушбу спортчиларимизнинг ғолиблик шоҳсупасига кўтарилиши, шунингдек қизлар ўртасидаги беллашувларда Нилуфар Ермаганбетова 5-ўрин, Сита Қадамбаева 7-ўрин билан халқаро турнирни якунлаши Ўзбекистон терма жамоаси 81 давлат орасида умумжамоа ҳисобида 3-ўринни эгаллашини таъминлади.
Португалия Гран-присида 1-ўрин 4 та олтин, 1 та кумуш, 1 та бронза медалига эга чиққан Жанубий Корея термасига, 2-ўрин 2 та олтин, 1 та кумуш медалга сазовор бўлган Португалия вакилларига тегишли бўлди.
“Париж-2024” Олимпиадаси учун муҳим рейтинг очколарини тақдим этган мазкур халқаро турнирда умумий ҳисобда 26 та давлат вакиллари 56 та медаллар жамғармасидан ҳеч бўлмаганда биттасини олишга эришган бўлса, 55 та давлат дзюдочилари ўз уйларига қуруқ қайтишди.
Энди жаҳон дзюдосининг етакчи жамоалари жорий йилнинг 4-5 февраль кунлари Парижда ўтадиган халқаро турнирда рўбарў келишади. Халқаро дзюдо федерацияси қайд этган талабномаларга кўра, Франция пойтахтида ўтадиган ушбу нуфузли мусобақада 85 та мамлакатнинг 550 нафар дзюдочиси медаллар учун кураш олиб боради.
“Paris Grand Slam-2023” турнирида мамлакатимиз терма жамоасининг 6 нафар аъзоси Ватанимиз шарафини ҳимоя қилиши белгиланган. Маҳоратли спортчиларимиздан Давлат Бобонов, Сардор Нуриллаев, Муроджон Йўлдошев, Музаффарбек Тўрабоев, Алишер Юсупов ва Шохруҳ Бахтиёров Париж татамиларида совринли ўринлар ҳамда Олимпиада рейтинг очколари учун баҳс юритади.
Эътиборли жиҳати, ёш спортчиларимиз Номонов ва Тиловов Алмададаги мураккаб ва шиддатли беллашувларда дунёнинг энг кучлиларини енгиб, 2 та олтинли бўлишди. Давлат Бобонов, Музаффарбек Тўрабоев сингари жаҳон чемпионларига эга бўлган таркибдаги жамоа ёшларимиз қайд этган натижани юксалтира олармикан?
Т.Рўзиев,
ЎзА