Қорақалпоғистон Республикаси божхона бошқармаси “Нукус” ташқи иқтисодий фаолият божхона пости ходимлари Қораўзак туманида фаолият юритаётган тадбиркорлик субъектлари фаолиятини жойига чиққан ҳолда ўрганиб, уларга божхона соҳасида янги қабул қилинган меъёрий ҳужжатлар ва яратилаётган енгилликлар тўғрисида тушунтиришлар берди.
Бугунги кунда ҳудудларда тадбиркорликни ривожлантириш, уларга сифатли хизмат кўрсатиш, маслаҳат бериш, фаолиятини амалга оширишга тўсиқ бўлаётган муаммоларни “корхонабай” ўрганиш ва тезкорлик билан ҳал этиш мақсадида, жойларда учрашувлар ташкил этилиб, уларнинг муаммолари батафсил ўрганилмоқда. Хусусан, туманда фаолият юритувчи “Қарақалпақ цемент” масъулияти чекланган жамияти қўшма корхонаси ҳудуддаги йирик цемент ишлаб чиқарувчи корхоналардан бири саналади. 2008 йилда ташкил топган ушбу корхона бугунги кунда йилига 400 минг тонна цемент ишлаб чиқариш қувватига эга.
Таъкидлаш жоизки, мамлакатимизда тадбиркорлик субъектларини ҳар томонлама қўллаб-қувватлаш, уларга кенг имкониятлар яратиш мақсадида қабул қилинган бир қатор қонунчилик ҳужжатлари бугун ўз самарасини бериб, тадбиркорлик субъектларининг ҳаражатларини қисқартириш ҳамда ишлаб чиқариш ҳажмининг ортишига замин яратмоқда.
Жумладан, импорт божхона божи ва қўшилган қиймат солиғидан озод қилинадиган технологик жиҳозлар бўйича қонунчилик ҳужжатларига мувофиқ, “Қарақалпақ цемент” МЧЖ қўшма корхонасига ўтган йиллар давомида божхона тўловларидан 10 миллиард 148 миллион сўм миқдорида божхона тўловларидан имтиёз қўлланилган.
Ўз ўрнида корхона божхона тўловларидан тежалган маблағларни ишлаб чиқаришни кенгайтириш ҳамда қўшимча иш ўринларини яратишга сарфлаган бўлиб, 2018 йилда заводнинг иккинчи қисми ишга туширилган. Бунинг натижасида корхонанинг самарадорлиги 2 баробар ошиб, йилига 400 минг тонна цемент ишлаб чиқариш қувватига эга бўлган.
Бугунги кунда корхона томонидан цемент ишлаб чиқариш ҳажмини йилига 1,2 миллион тоннага етказиш учун янги завод қурилишида ишлар жадал равишда олиб борилмоқда.Мазкур заводни ишга тушириш натижасида корхона томонидан 700 та янги иш ўрни яратилиши кўзда тутилган. Лойиҳа асосида Хитой Халқ Республикасидан 30 миллион ЕВРО га цемент ишлаб чиқарувчи замонавий ускуналар тўпламини харид қилиш режалаштирилган.
Учрашув давомида божхона ходимлари томонидан тадбиркорлик субъектларига ўз фаолиятларини янада кенгайтириш, келгусида ўз маҳсулотларини экспортга йўналтириш бўйича тегишли тавсия ва кўрсатмалар берилди. Мавжуд муаммо ва камчиликлар жойида ўрганилиб, бартараф этилди.
Бу каби ўтказилаётган тадбирларнинг барчаси мамлакатимизда тадбиркорлик субъектлари учун қулай шароит ва имкониятлар яратиш пировардида, халқимизнинг фаровон ҳаёт кечириши, бугунги кунидан рози бўлиб, эртанги кунига янада катта ишонч пайдо бўлишига хизмат қилади.
Довуд АБИБУЛЛАЕВ, ЎзА