Шу кунларда ҳудудларда Парламентнинг юқори палатасида доимий асосда ишловчи сенаторларнинг Олий Мажлиси Сенатининг ўн тўртинчи ялпи мажлисида маъқулланган қонунлар тарғиботига бағишланган учрашувлари бўлиб ўтмоқда.
Ана шундай тадбирлардан бири Навоий вилояти Учқудуқ туманида туман кенгаши депутатлари, кенгаш ҳузурида ташкил этилган “Халқпарвар” комиссияси аъзолари иштирокида ташкил этилди.
Очиқ-ошкора ва самимий ўтган учрашувда “Маҳаллий бюджет маблағлари сарфланишида жамоатчилик иштирокини таъминлаш тўғрисида”ги Сенат қарорининг мазмун-моҳиятини кенг жамоатчиликка етказиш, “Халқпарвар” комиссияси фаолиятини ташкил этиш борасидаги масалалар ўртага ташланди.
Олий Мажлис Сенатининг бюджет ва иқтисодий ислоҳотлар масалалари қўмитаси раиси Эркин Гадоев 2022 йил 1 январдан эътиборан, республиканинг барча туман (шаҳар)ларида тегишли бюджетларнинг тасдиқланган умумий харажатларининг 5 фоизи жамоатчилик фикри асосида шакллантирилган тадбирларни молиялаштиришга йўналтирилиши, жорий йил 1 июлдан бошлаб эса жамоатчилик фикри асосида шакллантирилган тадбирларни молиялаштиришга ажратиладиган туман бюджети қўшимча маблағларининг 30 фоизини йўналтириш белгиланганлиги, шунингдек, уй-жой қурилиши ва ипотека бозорини ривожлантиришга доир устувор вазифаларнинг амалга оширилиши устидан парламент ва жамоатчилик назорати ўрнатилиб, халқ депутатлари туман ва шаҳар Кенгашлари ҳузурида “Халқпарвар” комиссияси фаолияти йўлга қўйилганлиги таъкидланди. Учрашувда комиссия фаолияти ҳақида батафсил маълумотлар берилиб, уй-жойлар қуриш учун ер участкаларини ажратиш, субсидия тўланадиган фуқароларни танлаб олиш, уй-жой шароитларини яхшилашга муҳтож бўлган фуқаролар рўйхатини шакллантириш юзасидан жамоатчилик назоратини ўрнатиш ҳамда мазкур соҳада бюрократия ва бошқа маъмурий тўсиқларнинг олдини олишда “Халқпарвар” комиссиясининг роли ва аҳамияти ҳақида тўхталиб ўтилди.
Шунингдек, тадбирда туман бюджети маблағларининг тегишли қисмини жамоатчилик фикри асосида шакллантирилган тадбирларга йўналтириш бўйича ҳам назоратни олиб боришда халқ вакиллари – жойлардан сайланган депутатларнинг фаол иштироки ҳам муҳим аҳамият касб этиши алоҳида қайд этилди.
Олий Мажлис Сенатининг бюджет ва иқтисодий ислоҳотлар масалалари қўмитаси раиси Эркин Гадоевнинг депутатлар билан учрашуви давом этмоқда.
Абдували Бўриев, ЎзА