Унда депутатлар бир қатор қонун лойиҳаларини кўриб чиқмоқда.

Дастлаб, “Транспорт тўғрисида”ги қонун лойиҳаси иккинчи ўқишда моддама-модда муҳокама этилди.

Қонун лойиҳасининг мақсади — автомобиль, ҳаво, сув ва темир йўл ҳамда шаҳар йўловчи транспорти фаолияти ва ҳамкорлигининг ҳуқуқий, иқтисодий, ташкилий асосларини белгилашга қаратилган.

Лойиҳани иккинчи ўқишга тайёрлаш жараёнида айрим ҳаволаки нормалар чиқарилиб, тўғридан-тўғри ишлайдиган моддалар киритилди. Хусусан, қонун лойиҳасига умумий ўнга яқин тўлдириш қилинди. Лойиҳанинг асосий тушунчаларга оид моддаси қайтадан кўриб чиқилди ҳамда “аралаш ташиш” тушунчаси Фуқаролик кодексига мувофиқлаштирилди.

Лойиҳа транспорт ташкилотларининг жисмоний ҳамда юридик шахсларнинг мол-мулки хавфсизлигини, транспорт инфратузилмаси объектларидан фойдаланиш хавфсизлигини таъминлаши шартлиги тўғрисидаги қисм билан тўлдирилди.

Транспорт инфратузилмаси объектларига йўловчилар, юк жўнатувчилар, юк қабул қилувчилар, ташувчилар ва транспорт жараёнининг бошқа иштирокчиларига хизмат кўрсатиш, шунингдек, транспорт воситаларининг ишлашини таъминлаш учун мўлжалланган тузилмалар, ишлаб чиқариш ва технологик комплекслар киради.

Қонун лойиҳаси билан киритилаётган чекловлар ишларнинг реал ҳолатини ҳисобга олмаслиги ва фойдаланилмаётган бинолар ижарага берилишини тақиқлагани сабабли тадбиркорлик субъектлари ҳуқуқлари бузилишига, шу билан бирга, транспорт инфратузилмаси объектлари ҳудудида жойлашган савдо шохобчалари ва умумий овқатланиш шохобчалари ёпилишига, автомобиль йўллар бўйлаб рекламалар жойлаштирилишида чекловларга олиб келиши мумкин.

Шу муносабат билан қонун лойиҳасида транспорт инфратузилмаси объектларининг ишлаши ва хавфсизлиги таъминланишига тўсқинлик қиладиган иқтисодий ва бошқа фаолиятни амалга оширишга ҳамда транспорт хизматларини кўрсатишга йўл қўйилмаслиги янги таҳрирда баён қилинди.

Қизғин муҳокамалардан сўнг қонун лойиҳаси иккинчи ва учинчи ўқишда қабул қилинди ҳамда Сенатга юбориладиган бўлди.