Ватанимиз тарихидаги 27 январь санаси билан боғлиқ айрим воқеалар баёни.

1889 йил (бундан 132 йил олдин) – Россиянинг Бухородаги сиёсий агенти Николай Чариковнинг 1889 йил 27 январдаги махфий хатида ёзилишича, бухоролик савдогар Латифхўжа (жадидчилик ҳаракатининг йирик вакили, ўзбек матбуотининг илк ташкилотчиларидан бири Убайдулла Хўжаевнинг укаси) катта миқдорда милтиқ келтираётганда Узун-Ада (Красноводск)да божхона ходимлари томонидан ушланди.

Тарихчи Даврон Разоқовнинг қайд этишича, 1320 сўмга сотиб олинган бу милтиқлар учун Латифхўжа 3700 сўм жарима тўлаб, жами 5 минг сўм зарар кўрган. Бухоро амири Абдулаҳад Остонақул қушбеги орқали Латифхўжани бир марта кечиришларини рус сиёсий агентидан сўраганида Чариков жарима империя қонунлари асосида олингани, шунинг учун бундай масъулиятни зиммасига ололмаслигини билдирган.

Шунингдек, Латифхўжадан ташқари Мулла Солиҳ сарроф, Солиҳбой, Абдулкаримбой каби бухоролик савдогарлар ҳам Русиядан келишида олиб келган милтиқларни Остонақул қушбегига келтириб сотганлар.

1935 йил (бундан 86 йил олдин) – биолог-биофизик олим, Ўзбекистон Фанлар академияси академиги Бекжон Тошмуҳамедов таваллуд топди. У атоқли ёзувчи Ойбекнинг ўғли.

1992 йил (бундан 29 йил олдин) – Африка жанубидаги Зимбабве Республикаси Ўзбекистон Республикаси мустақиллигини тан олди.

1992 йил (бундан 29 йил олдин) – Ўзбекистон Республикаси Олий Кенгаши Раёсатининг “Ўзбекистон Республикаси таркибида Навоий вилоятини қайтадан тиклаш ҳақида”ги қарори қабул қилинди. Унга мувофиқ Навоий вилояти аввалги чегараларида қайтадан тикланиб, унинг таркибига Бухоро вилоятининг Навоий, Зарафшон ва Учқудуқ шаҳарлари, Конимех, Қизилтепа, Навбаҳор, Навоий, Томди, Учқудуқ туманлари, Самарқанд вилоятининг Нурота ва Хатирчи туманларини киритилди. Навоий шаҳри вилоятнинг маъмурий маркази этиб белгиланди.

Маълумот ўрнида қайд этиш керакки, Навоий вилояти 1982 йил 20 апрелда Бухоро ва қисман Самарқанд вилоятлари ҳудудларидан ташкил этилган. 1988 йилда маъмурий бирлик сифатида тугатилган. Юқорида таъкидланганидек 1992 йил бошида қайта тикланди.

2002 йил (бундан 19 йил олдин) – икки палатали парламент ва Президент ваколати муддатини узайтириш масаласи бўйича умумхалқ референдуми бўлиб ўтди. Референдумда халқимиз қуйидаги икки саволга жавоб берди: 1. Ўзбекистон парламенти икки палатали бўлишини маъқуллайсизми? 2. Ўзбекистон Республикаси Президентининг ваколати беш йилдан етти йилга узайтирилишини маъқуллайсизми?

2005 йил (бундан 16 йил олдин) – дастлаб бир палатали парламент сифатида вужудга келган Ўзбекистон Республикаси Олий Мажлиси икки палата: Қонунчилик палатаси (қуйи палата) ва Сенат (юқори палата)дан иборат қилиб шакллантирилди.

2009 йил (бундан 12 йил олдин) – Ўзбекистон Республикаси Вазирлар Маҳкамасининг «Навоий» эркин индустриал-иқтисодий зонаси фаолиятини ташкил этиш чора-тадбирлари тўғрисида»ги қарори қабул қилинди.

Алишер ЭГАМБЕРДИЕВ тайёрлади