Давлатимиз раҳбарининг 2018 йил май ойида Наманган вилоятига ташрифи давомида лойиҳа сифатида тақдим қилинган Учқўрғон туманидаги “DB Group Eco” масъулияти чекланган жамияти ҳудуднинг балиқчилик салоҳиятини ривожлантиришда муҳим аҳамият касб этмоқда.
Корхона тасарруфидаги 5 гектар майдонда балиқчилик комплекси ишга туширилган бўлиб, ҳозирда мавжуд 66 та интенсив ҳавзаларда балиқнинг ноёб тури – форель ва лосось парваришланмоқда. Балиқ чавоқлари Дания давлатининг “AQUASEARCH OVA APS”, “TROUTEX APS” фирмаларидан, озуқа еми эса Голландиянинг “ALLTECH COPPENS” фирмасидан олиб келинмоқда. Хўжаликнинг йиллик балиқ етиштириш қуввати 1000 тоннани ташкил этади.
Лойиҳа бўйича навбатдаги вазифа экотуризм ҳудудини ташкил этиш бўлиб, ушбу вазифани амалга ошириш учун “DB Group Fish Trading” МЧЖ ташкил этилди. Экотуризм майдонини барпо этиш учун ушбу корхонага 1 гектар ер майдони ажратиб берилди.
Ҳозирда “DB Group Eco” МЧЖ қошида “Балиқни қайта ишлаш цехи” қуриб битказилди. Корхонада етиштирилган балиқлар ушбу цехда қайта ишланиб, ички ва ташқи бозорга етказиб берилади. Шунингдек, балиқлар учун озуқа ем ишлаб чиқариш цехи қурилиши бошлаб юборилган.
Корхонада айни пайтда 50 нафар киши меҳнат қилмоқда. Лойиҳа тўлиқ амалга ошгач, ишчилар сони 100 нафарга етказилади.
Ҳотам МАМАДАЛИЕВ олган суратлар, ЎзА