Халқаро футбол федерацияси (ФИФА) расмий сайти маълум қилишича, 2026 йилги футбол бўйича жаҳон чемпионатида ғолиб бўлган терма жамоа футболчилари ва мураббийлар штаби тарихда илк бор чемпионлик узукларига эга бўлади.

Хабарда айтилишича узукнинг бир томонида Жаҳон чемпионати кубоги тасвирланади, иккинчи томони эса ғолиб жамоанинг рамзларига мослаштирилган ҳолда махсус дизайнда ишланади. Чемпионлик узуклари жами 2026 дона чекланган нусхада ишлаб чиқарилиб, уларнинг 30 таси бевосита турнир ғолибларига топширилади. Қолган 1996 узук эса мусобақанинг расмий лицензияланган маҳсулоти сифатида бутун дунё бўйлаб футбол мухлислари учун сотувга чиқарилади.

Бунда ҳар бир узук ўзига хос индивидуал рақамга эга бўлиб, эгасининг бармоғига мослаштирилади ва махсус ҳақиқийлик сертификати билан бирга етказиб берилади. Финал учрашуви якунланиши билан ғолиб жамоа сардори ва бош мураббийига ушбу тарихий воқеанинг эсдалиги сифатида рамзий узуклар топширилади. Сўнгра ғолибларга аталган 30 та узукнинг ҳар бири кейинчалик персоналлаштирилиб, расмий равишда ўз эгаларига тақдим этилади.

Эслатиб ўтамиз, ЖЧ-2026 финалида Испания ва Аргентина терма жамоалари ўзаро беллашади. Нью-Йоркда бўлиб ўтадиган ҳал қилувчи учрашув 19 июлдан 20 июлга ўтар кечаси, Тошкент вақти билан 00:00 да бошланади.

Маълумот ўрнида айтадиган бўлсак, Аргентина терма жамоаси уч карра жаҳон чемпиони ҳисобланади (1978, 1986, 2022). Амалдаги чемпионларнинг яна финалга йўл олиши тарихда олтинчи марта бўлиб, шу пайтгача фақат Италия (1934, 1938) ва Бразилия (1958, 1962) терма жамоалари ўз унвонларини ҳимоя қила олган. Испания терма жамоаси эса ўз тарихида иккинчи марта мундиал финалида иштирок этади. Ушбу терма жамоа 2010 йилда чемпионликни қўлга киритган эди.

Адилбай Оразов,

Қорақалпоғистон ахборот агентлиги шарҳловчиси