Инсон ҳаётида турли синовларни бошидан кечиради. Сабрингни синайдиган вақтлардан мардона ўтган одамгина меҳнатининг мевасини кўрадиган бахтли кунларга етишади.

Бугун уйи атрофи жаннатмакон кўринишга эга бўлган Камилжан отанинг ҳам бу даражага эришиши бирдан бўлмади. Бундан неча йиллар олдин туғилиб ўсган уйи ёниб кетиб, тўрт ака-ука уйсиз қолганда улар учун оғир кунлар бошланган эди. Меҳнатдан қочмай, ер билан тиллашган Камилжан Алламбергенов ҳаётидаги бу синовни мардона енгиб ўтди. Ҳукумат ишида ишлаш билан бирга умр йўлдоши Салима опа билан биргаликда ўғил-қизларини вояга етказиб, уй ёнидаги томорқада экин экиб, боғ яратиб бугун элга машҳур боғбон бўлди. У бугун оиласи билан биргаликда Хўжайли туманидаги «Мустақиллик» ОФЙда уй ёнидаги томорқасида боғ-боғча, полиз маҳсулотлари билан бирга асалари боқиб асал маҳсулотини ҳам етиштириб келмоқда.

Туман марказидан унча узоқ бўлмаган бу қишлоқда томорқаларини обод қилиб қўйган хўжаликлар кўпчиликни ташкил этади. Лекин, шулар орасида бугун ижтимоий тармоқда Нигора исмли қизи томонидан очилган инстаграмм саҳифасида бир неча обуначиларига эга бўлган боғбоннинг етиштираётган маҳсулотларини бориб кўрганимизда, гўзал кўринишдан кўзимиз қувончга тўлди.

Уй ёнидаги томорқасида бир неча хил боғ-роғ маҳсулотларини етиштираётган деҳқон отанинг маҳсулотларини кўриб ҳайратимизни яшира олмадик. Оила аъзолари билан биргаликда бир гектар ерга экиб қўйган турли мева-чева ва полиз экинлари пишиб, кўзни қувонтириб турганлиги уларнинг меҳнатлари самарасидир, албатта.

– 2017 йилда муҳтарам Президентимиз билан учрашиш бахтига муяссар бўлдим. Шундан сўнг ҳукуматимиз томонидан боғдорчиликни ривожлантириш бўйича кўмак берилиб, солиқлардан имтиёзлар жорий қилинди. Ўша учрашувдан сўнг ўзимда тетиклик сезиб, руҳий куч бағишлаб ишларим юришиб кетди. Вилоятлардан бориб мева кўчатларини олиб келиб ўтқаза бошладим. Ҳозир ҳар хил мевалардан боғимиз гуллаб-яшнамоқда. Катта ўғлим оилавий меҳрибонлик уйини очиб, ҳозирги вақтда ўн битта болани қарамоғимизга олганмиз. Уларга боғимиздан етиштирган маҳсулотларни бериб юбориб турибмиз. Асаларичилик билан ҳам шуғулланиб, асал маҳсулотлари етиштиряпмиз. Мевалардан табиий сирка тайёрлайман. Ўрик қоқлайман. Кўчат етиштириб, сотамиз. Мол-ҳол боқамиз. Уйимизда қараб ўтирган одам йўқ. Эрта тонгдан туриб тоза ҳавода экинларни парваришлаш билан шуғулланамиз. Даромадимиз яхши. Юртимизда меҳнат қилган одам яхши яшаяпти. Тадбиркорлик, фермерлик билан шуғулланаман деган барча имкониятлар бор. Фақат меҳнат қилиб,  ҳаракатдан тўхтамаслик керак, – дейди Комилжон ота.

Ҳақиқатан ҳам Камилжан отанинг уйи атрофи олма, шафтоли, ўрик, нок, узум, олхўри, гилос каби бир-биридан ширин мевалар билан бирга қовун, тарвуз, помидор, бодринг, бақлажон, қалампир, ошқовоқ, паловқовоқ ва бошқа полиз маҳсулотлари уларнинг меҳнатлари эвазига мўл ҳосил бериб, оиласига даромад киритишга асос бўлмоқда. «Меҳнат қилсанг эринмай, қорнинг тўяди тиланмай,» дегани шу экан-да, дейсан уларнинг тўкин дастурхонини, бахтли турмушини кўриб.

– Худога шукр, шу меҳнатларимиз эвазига фарзандларимизни ўқитдик, уйли-жойли қилдик, тўйлар қилдик. Кўкаламзор, баҳаво уйимиз атрофи бизга доимо куч-қувват бериб туради, – дейди Камилжан отанинг умр йўлдоши Салима опа.

Оилавий меҳрибонлик уйи очиб, қарамоғига олган фарзандлари, улар берган таълим-тарбиясидан натижа чиқариб, икки фарзанди университетнинг юридик факультетига ўқишга кирди. Комилжон ота билан Салима опа набиралари билан қўшиб уларга ҳам доимо парвона.

Ўрикларни қуритиб, асалари қутиларини суриб, экинларини бегона ўтлардан тозалаб, мева кўчатларини бир-бирига пайвандлаб, далани суғориб, хуллас, етмиш ёшни қоралаб қолган бўлса-да тиниб-тинчимайдиган Комилжон ота энди уй ёнидаги тўрт сотих ерда интенсив усулдаги иссиқхона яратиб, у ердан цитрус мевалар етиштиришни ният қилмоқда. Деҳқон отанинг етиштирган маҳсулотлари Қозоғистонга экспорт қилинмоқда. Шунингдек, мева кўчатларини экишга қизиққан маҳаллий фуқаролар билан бирга вилоятлардан ҳам келиб, унинг етиштирган мева кўчатларини сотиб олиб кетади.

Камилжан Алламбергеновнинг боғдорчиликни ривожлантиришга қўшаётган ҳиссалари ҳукуматимиз томонидан муносиб баҳоланиб, «Меҳнаткаш деҳқон» кўкрак нишони билан тақдирланди.

– Биз келгусида боғбон ота билан вилоятларга бориб тажриба алмашиш ва ёшларни тўплаб, уларга боғдорчилик сирларини ўргатиш учун амалий кўргазмалар ташкил этишни режалаштиряпмиз, – дейди «Мустақиллик» ОФЙдаги ҳоким ёрдамчиси Насиба Арткиова.

Узоқ-яқиндан кўзга ташланиб, инсон қўли билан бунёд этилган гўзаллик, кўкаламзорлик, боғдорчилик бизда алоҳида таассурот қолдирди. Боғларни кўриб юрибмиз қишлоқларда. Бироқ, Комилжон отанинг боғи барибир бошқача. Унда меҳнаткаш инсоннинг сабр-тоқати билан эришган меҳнатлари самара бермоқда.

Гулнара Турдишова,

Қорақалпоғистон ахборот агентлиги