Ассалому алайкум, ҳурматли юртдошлар!

Азиз футбол мухлислари!

Барчангизни бугунги файзли оқшомда ўтказилаётган катта футбол байрами билан табриклайман.

Бугун – ўзбек футболи учун яна бир тарихий кун. Катта ишонч ва эзгу тилаклар билан миллий терма жамоамизни АҚШ, Мексика ва Канада майдонларида бўлиб ўтадиган футбол бўйича жаҳон чемпионатига кузатамиз.

Фурсатдан фойдаланиб, бизга мана шундай унутилмас кунларни тақдим этган маҳоратли футболчиларимизга, уларни тарбиялаб, вояга етказган ота-оналарига, устоз ва мураббийларига, терма жамоамизнинг барча аъзоларига бутун халқимиз номидан чуқур миннатдорлик билдираман.

Қадрли дўстлар!

Сизларнинг миллий жамоага бўлган меҳрингиз ва садоқатингиз ҳар қанча таҳсинга лойиқ. Иссиқни иссиқ демай, ёмғирни ёмғир демай, ғалаба онларида ҳам, қийин дамларда ҳам футболчилар билан бирга бўлиб, ҳақиқий ватанпарварлик намунасини кўрсатиб келяпсиз. Бунинг учун стадионни тўлдириб ўтирган мухлисларга, сизлар орқали футболсевар халқимизга алоҳида раҳмат айтаман.

Бугун стадионда фан-клубларимизни ҳам кўриб турибман. Улар терма жамоа ўйинларини нафақат трибунадан кузатяпти, балки футболчилар билан бирга курашяпти, футболнинг ичида яшаяпти.

Фан-клублар аъзолари ҳар бир ўйинда чин ўзбекона, бетакрор услуби билан ўн иккинчи ўйинчи вазифасини муносиб бажариб келяпти, десам, ўйлайманки, сизлар ҳам фикримга қўшиласиз.

Ишончим комил, улар мундиалда ҳам минглаб юртдошларимиз, хориждаги ватандошларимиз билан бирга, худди ҳозиргидек ғайрат-шижоат ва ҳайқириқлар билан футболчиларимизни қўллаб-қувватлашади.

Ҳурматли юртдошлар!

Юртимизда футбол аллақачон ҳар бир оиланинг дўстига айланиб улгурган, десак, ҳеч қандай муболаға бўлмайди.

Кўриб турибман, бугун ҳам кўпчилигингиз стадионга фарзанд ва набираларингиз билан келгансиз. Спортчиларимиз эришаётган ютуқлардан руҳланиб, уларнинг орасидан ҳам янги-янги чемпионлар албатта чиқади.

Янги Ўзбекистонда спортга қаратилаётган эътибор, ҳар бир ҳудудда бунёд этилаётган йирик спорт иншоотлари, жойларда ташкил этилаётган профессионал футбол академиялари, яқинда иш бошлаган “Миллий футбол маркази” ёшларимиз янги-янги ютуқларни қўлга киритиши учун мустаҳкам замин бўлади.

Ўтган йили пойтахтимизда 100 гектардан зиёд майдонда 5 та йирик спорт мажмуасини ўз ичига олган Олимпия шаҳарчасини қуриб битказдик. Янги Тошкентда ФИФА стандартларига тўлиқ жавоб берадиган 55 минг ўринли муҳташам стадион қад ростламоқда. Бу стадион юртимиздаги миллионлаб футбол мухлислари учун катта совға бўлади. Бундай замонавий иншоотлар мамлакатимизда кўплаб нуфузли халқаро спорт мусобақаларини ўтказишга хизмат қилади. Спортчиларимизни янада улкан ва ёрқин ғалабалар сари етаклайди.

Қадрли терма жамоа аъзолари!

Бугун халқимиз юқори кайфият билан сизларга оқ фотиҳа бериб, катта мундиалга кузатмоқда. Сизларни олдинда Португалия, Колумбия, Конго каби кучли терма жамоалар билан муҳим ўйинлар кутиб турибди.

Катта куч-ғайрат билан, ишонч билан майдонга чиқинг!

Шуни билингки, биз доим сизлар билан биргамиз!

Ҳақиқий ўзбекона жасорат, матонат ва иродангиз билан чиройли ва ишончли ўйин кўрсатиб, барчамизни хурсанд қиласиз, деб ишонамиз.

Азиз юртдошлар!

Бугун сизларнинг қаторингизда менинг қалбим ҳам фахр ва ифтихорга тўлиб турибди. Ўзбек халқи ҳамиша катта орзу-умидлар билан фақат олдинга интилиб яшаган. Келинглар, бугун ҳаммамиз яхши ният қилайлик:

Янги Ўзбекистон спорти янада ривожлансин, футболимиз янада гуллаб-яшнасин!

Барчангизга мустаҳкам соғлиқ, омад ва зафарлар ёр бўлсин!

Яшасин ўзбек футболи!

Яшасин Янги Ўзбекистон ёшлари!

Яшасин бунёдкор Ўзбекистон халқи!